Musila F.C iha Ambisaun Boot Sai Kampiaun Liga Futsal Époka 2026-2027

Fundadór Musila F.C, Aqing Ung.

Díli, 26 Agostu 2026 (RAFA) – Kampiaun Copa Asosiasaun Futsal Timor-Leste (AFTL), Musila F.C, hatudu ambisaun boot atu luta ba títulu kampiaun Liga Futsal Primeira Divizaun époka 2026-2027.

Fundadór Musila F.C, Aqing Ung, ba  RAFA iha Federasaun Futeból Timor-Leste (FFTL), Kuarta-ne’e hatete estrutura klubu halo esforsu no investimentu boot hodi prepara ekipa atu bele konkore ba títulu kampiaun iha êpoka foun ne’e.

“Musila nia ambisaun ba 2026 hakarak sai kampiaun Liga Futsal 2026. Tanba ne’e, ami estrutura halo investimentu maka’ás hodi rekruta jogadór esperiente sira iha futsal, no mós fó oportunidade ba jogador foun sira,” Aqing Ung haktuir.

Nu’udar parte husi preparasaun Musila F.C  rekruta treinadór ida husi Indonézia ho lisensa AFC Level 3, no mós jogadór foun na’in tolu husi Indonézia atu reforsa ekipa ba kompetisaun ne’e.

“Klubu hahú ona treinamentu dezde fulan-Juñu. Ami iha jogador esperiente na’in-ualu, no mós jogador foun na’in-ualu ne’ebé mai reforsa ekipa,” Fundadór Musila F.C ne’e hateten.

Treinador foun ne’ebé sei lidera Musila F.C iha Liga Futsal 2026-2027, Yusuf Mameng Maulana. Enkuantu jogador na’in-tolu husi Indonésia Bemby Hakim, Dadang Prasetyo no Ikhwan.

Liga Futsal Primeira Divizaun époka 2026-2027 sei hahú iha  loron 11 fulan-Setembru 2026, no Musila F.C sei hasoru Ramelau F.C iha jogu abertura.

Jornalista: Marito da Costa