Mushila F.C Halakon Kuda Ulun F.C ho Score Fantastiku 8-3

Mushila F.C. Imajen/AFTL

Díli, 28 Maiu 2026 (Rafa.tl)- Mushila F.C susesu halakon nia adversariu ekipa Kuda Ulun F.C ho score fantastiku 8-3 iha jogu kontinuasaun Kopa Asosiasaun Futsal Timor Leste (AFTL) faze apuramntu grupu D.

Jogu ne’ebé hala’o iha kampu futsal Kuartel Jenerál F-FDTL, Díli, Kuarta (27/05/2026), hahú inisiu  kedas ekipa Mushila F.C ne’ebé reforsa husi jogadór selesaun nasionál na’in-haat hatudu kedas performa impresivu no hala’o jogu ho intensidade aas.

Prezensa jogadór selesaun nasionál sira halo ekipa ne’e domina liu bola desde minutu dahuluk. Koordenasaun entre liña avansadu no defeza haré solidu, no Mushila F.C konsege kria oportunidade barak durante jogu.

Kombinasaun esperensia no abilidade hosi jogadór selesaun nasionál sira mos ajuda ekipa kontrola ritmu jogo no fó presaun ba adversáriu ho nune’e ekipa Mushila F.C konsege produs golu tolu tui-tuir malu liu hosi jogadór Joel Fernandes iha minutu tolu, Elvinho Guterres iha minutu haat no Natalino Sang iha minutu lima.

Ho golu tolu tui-tuir malu ne’e obriga ekipa Kuda Ulun F.C foti time out, hodi halo mudansa ba tatika no mudansa konsege fo rezulatadu pozetivu iha minutu 14 kapitaun ekipa Kuda Ulun F.C Jose Rodriguez konsege responde golu ida hodi hamihis score ba 3-1.

Ho score refere halo ekipa rua lansa kontra atake makasa ba malu, maibé to’o termina jogu priemeira parte score 3-1 mantein la muda.

Kontinua ba jogu segunda parte, Mushila F.C la muda ritmu jogu hodi mantein jogu ho agresivu no lansa kontra atake maka’ás, ho nune’e,  ekipa Mushila F.C produs tan golu lima liu hosi jogadór João Paulo iha minutu 23, Angelo Fernandes iha minutu 29, Joel Fernandes iha minutu 31, Elvinho Guterres iha minutu 33 no Rivaldo Faria iha minutu 39.

Enkuantu ekipa Kuda Ulun F.C produs deit golu rua liu hosi jogadór Petrus Nahak iha minutu 34 no Nelio Cardoso iha minutu 38.

Hosi rezulatadu vitória ne’e hatuur ekipa Mushila F.C iha pozisaun dahuluk tabela klasifikasaun grupu D ho pontu tolu  no ekipa Kuda Ulun F.C iha pozisaun daruak, tanba iha grupu D iha deit ekipa rua tanba ne’e se’i joga home away.

Jornalista : Davilio Valdameir/Editór: Vito Salvadór