Mushila F.C Hakat Ba Meia-Finál Kopa AFTL 2026 Hafoin Halakon Coelho F.C ho Score 3-2

Imajen/AFTL

Díli, 08 Juñu 2026 (RAFA.TL), — Mushila F.C susesu hakat ba faze meia-finál Kopa Asosiasaun Futsal Timor Leste (AFTL) 2026 hafoin halakon adversáriu Coelho F.C iha Quartu Finais ho score 3-2.

Jogu entre ekipa zigante rua ne’e hala’o iha kampu futsal FALINTIL-Forsa Defeza de Timor Leste (F-FDTL), iha Díli, Segunda (08/06/2026). Iha jogu  inisiu ekipa rua ne’e hala’o jogu ho kuidadu tebes hodi lansa kontra atake ba malu.

Tama ba iha minutu lima Mushila F.C foti inisiativa hodi halo jogu ofensivu hodi lansa atake ne’ebé lais, maibé tentativa hirak ne’e seidauk bele hatudu rezulatadu pozetivu.

Iha minutu hitu Coelho F.C konsege produs golu supreza ne’ebé mak marka hosi jogadór António da Silva hodi lori Coelho F.C lidera provizoriu ho score 1-0.

Escore ne’e la dura to’o tempu naruk tanba liu de’it minutu ida Mushila F.C konsege responde hikas golu ida hodi halo empata ba score  1-1 liu hosi Kapitaun ekipa Mushila F.C Joel Fernandes.

Ho score refere ritmu jogu lao ho intensiddade aas liután ba ekipa rua ne’e hodi lansa kontra atake ba malu, maibé to’o termina jogu priemeira parte score 1-1 mantein la muda.

Tama ba segunda parte jogu ne’e sai atrativu liután ba ekipa rua hodi lansa kontra atake ne’ebé halo atmosfera jogu sente manas liu iha kampu, no tama ba iha minutu 23 João Paulo Canizo susesu lori nia ekipa Mushila F.C lidera hikas ho score 2-1.

Jogadór ho númeru kamizola 30 ne’e marka golu hafoin hadau bola hosi António da Silva iha linha klaran no aproveita hodi fura rede Coelho F.C.

Liu deit minutu rua João Paulo Canizo marka tan golu hodi haboot liu tan score ba 3-1 hafoin servisu hamutuk pasajen badak hosi ain ba ain ho nia kompatriota Joel Fernandes no aproveita hodi fura tan rede Coelho F.C.

Ho score refere tensi jogu manas ba beibeik. Coelho F.C hala’o jogu ho agresivu liu tan ho nune’e tama ba iha minutu 27 Miguel Fernandes konsege halo barullu iha área grandeal Mushila F.C nian no ikus mai Jogadór estranjeiru Mushila F.C halo blunder hodi akontese auto golu hodi hamihis hikas Score Sai 3-2.

Ho score refere ekipa Coelho F.C hala’o jogu agresivu liu tan no halo tentativa oioin liu hosi joga ho power play hodi kontinua domina bola, maibé defeza hosi Mushila F.C mantein solidu no la fó fatin ba ekipa Coelho F.C hodi produs golu ho nune’e to’o termina jogu Segunda parte score mantein 3-2 vitóri ba Mushila F.C.

Hosi rezulatadu vitória ne’e lori ekipa Mushila F.C asegura billete ida ba meia-finál Kopa AFTL 2026, enkuantu ekipa Coelho F.C obrigadu tenke elimina hosi eventu refere tanba jogu Quartu Finais ne’e ho sistema bota fora ka lakon sai.

Jornalista: Davilio Valdamir/Editór: Vito Salvadór