Motorista Transporte Públiku Preokupa Ho Folin Kombustível Ne’ebé Aumenta iha Merkadu Nasionál

Estasionamentu transporte públiku iha Becora, Díli. Imajen/Rafa.tl

DÍLI, RAFA.tl – Motorista sira transporte públiku, hanesan Bus, Mikrolete, Táxi no Angguna, preokupa ho folin kombustível ne’ebé aumenta iha merkadu nasionál.

Notísia Relevante: Governu iha Alternativu Responde Preokupasaun Folin Kombustível iha Merkadu Nasionál

Dau-daun ne’e, fatin estasionamentu kombustível iha Kapitál Díli, liu-liu ba gazoleu ho folin sa’e ba $1,35 kada litru no Gazulina $1,23 kada litru.

Motorista transporte públiku sira-ne’e rekomenda ba governu atu aumenta presu (folin) ba pasajeiru sira tuir folin kombustível, nune’e iha balansu ba rendimentu, hodi garante sirkulasaun ba atividade ekonómiku, komérsiu no investimentu kontinua la’o ba oin.

Haré ba Funu entre Estadus Unidus Amérika-Israel no Iraun ne’ebé mosu iha loron 28 fulan-Fevereiru tinan 2026, la’ós de’it krize iha Médiu Oriente, maibé fó mós impaktu ba nasaun sira iha Sudeste Aziátiku, inklui Timor-Leste ne’ebé dependente ba mina-rai iha Golfu Pérsiku.

Ho folin kombustível ne’ebé aumenta, motorista sira hatete, sira nia parte seidauk hola desizaun rasik hodi aumenta folin ka presu ba pasajeiru sira, maibé husu ba ministériu kompotente atu tau atensaun sériu ba krize kombustível ne’ebé afeta mós mai Timor-Leste.

“Ami sente ne’e fó impaktu ba ami kondutór sira bus nian, tanba  mina agora folin sa’e, agora ami la’o ba mós pasajeirus mós araska oituan, ami kadavez tula na’in lima, ne’en, dalaruma mai mós enxe mina la to’o, agora mina folin sa’e ona hanesan ne’e, tarefa ne’ebé aplika ba  pasajeirus  presiza halo revizaun. Ezemplu bus halai Dili-Viqueque durante US$8.00 kada pesoál, agora ho folin mina sa’e tenke hasae mós kustu ba pasajeiru sira,” Motorista Bus Viqueque, Rogério Carvalho, ba Rafa.tl iha Estasionamentu transporte públiku iha Becora, Kuarta (11/03/2026).

Motorista Bus Viqueque ne’e mós husu atu kada pasajeru Díli ba Viqueque no husi Viqueque mai Díli sa’e ba U$S 9.00, nune’e iha balansu ho presu kombustível ne’ebé aumenta.

Iha fatin seluk, motorista Mikrolete 07, Tolentino de Sousa, hatete, ho folin kombustível ne’ebé sa’e, fó impaktu ba sira nia rendimentu no husu atu Governu haré assuntu ne’e ho seriedade.

“Ami atu husu de’it mós bele fó fali impaktu ba ami, ne’ebé ami lakohi atu ezije, maibé governu  mak tetu atu bele autoriza kustu ba pasajeiru sira. Agora sei nafatin hela US$0.15, ami husu liu-liu ba estadu tenke aumenta ba US$0.20”. Tolentino de Sousa hateten.

Kondutór Angguna Diresaun Díli ba Ainaro, Abrão da Costa Araújo hatete, folin kombustível ne’ebé aumenta fó impaktu ba sira maibé tanba nesesidade uma laran obriga tenke kontinua halo movimentasaun tula pasajeiru hodi buka osan ba sustenta família.

“Ami tenke la’o nafatin, presu ba pasajeiru atu aumenta no la aumenta ne’e depende ba ami kondutór, karik ami hasa’e folin pasajeiru sira ba kesar ami, karik polísia sira  prende ami, ami kona koima nafatin,” Abrão da Costa Araújo tneik.

Nia hatutan, to’o agora pasajeiru husi Díli ba Aileu aplika kustu US$2.00, ba Maubisse US$4.00 no presu ne’e nafatin tuir saida mak Governu fó.

Taxista António Freitas hatete, ho presu kombustível ne’ebé aumenta, nia parte mós implementa ona presu ba pasajeiru sira,  depende ba distánsia, bele husu hahú husi  US$3.00 to’o US$7.00, no bele liu se distánsia ne’e dook liu.

“Se husi Becora ba Tasi-Tolu bele US$7.00 ne’e ami ba ona, se distánsia besik, hanesan Becora ba Bidau US$2.00, maibé agora ne’e mina folin sa’e ona, entaun presiza haré mós kestaun ne’e,” António Freitas hateten.

Iha observasaun Rafa.tl hatudu katak, maske folin ba kombustível iha teritóriu nasionál aumenta, maibé presu ba pasajeiru sira hanesan Bus, Mikrolete no Angguna sei nafatin no sirkulasaun transporte públiku sira kontinua hanesan bai-bain hodi transporta pasajeiru sira no Estudante sira inklui negosiante sira ne’ebé halo negósiu.

Reportajen ekipa Rafa.tl