Ministru Nelio Isaac Sarmento Kansela Modalidade Karatedo ho Boxing Ba ASIAN Games 2026

Ministru Juventude, Desportu, Arte no Kultura (MJDAK), Nelio Isaac Sarmento.

Díli, 06 Agostu 2026 (RAFA)- Ministru Juventude, Desportu, Arte no Kultura (MJDAK), Nelio Isaac Sarmento, klarifika ba públiku katak modalidade Karatedo no Boxing la partisipa iha ASIAN Games Aichi–Nagoya, Japaun 2026 tanba federasaun rua-ne´e enfrenta problema iha organizasaun instituisionál no hamosu dualizmu iha lideransa.

MJDAK Nelio Isaac Sarmento ba RAFA iha Díli, Kinta-ne’e,  hateten desizaun ne’e MJDAK foti atu fó oportunidade ba federasaun rua ne’e halo avaliasaun interna no hadi’a organizasaun hodi aumenta prestasaun iha future

Karatedo durante ne’e sempre partisipa iha kompetisaun internasionál hanesan SEA Games no ASIAN Games, maibé seidauk hatudu rezultadu satisfatóriu.

“Ita fó oportunidade ba federasaun halo avaliasaun ba nia organizasaun. Ita haré katak Karatedo sempre partisipa iha SEA Games no ASIAN Games, maibé seidauk hatudu prestasaun. Prestasaun la’ós deit hetan medalla, maibé pelu menus atleta sira bele tama iha pozisaun haat ka lima. Bainhira ida ne’e la akontese, tenke halo avaliasaun atu buka problema sira, hanesan idade atleta, preparasaun no programa federasaun nian,” Ministru Nelio Isaac Sarmento hateten.

Nia esplika mós katak Boxing mós enfrenta problema interna organizasaun nian ne’ebé to’o agora seidauk rezolve, maski Governu dala barak husu atu hadi’a, tanba ne’e, modalidade ne’e mós la partisipa iha ASIAN Games tinan ida ne’e.

“Boxing mós hanesan. Sira iha problema interna organizasaun nian. Ha’u dala barak husu atu hadi’a, maibé seidauk iha mudansa. Tanba ne’e, di’ak liu halo avaliasaun no la partisipa iha ASIAN Games, hodi fó oportunidade ba modalidade seluk,” Nelio Isaac Sarmento haktuir.

Maski nune’e, Governante ne´e reafirma katak Karatedo no Boxing sei iha oportunidade atu partisipa iha SEA Games 2027 iha Malázia, ho kondisaun katak federasaun sira tenke hadi’a organizasaun, prepara programa treinamentu ne’ebé di’ak no halo selesaun ba atleta sira ne’ebé iha kapasidade atu konkore iha nivel internasional.

Tuir lista, modalidade desportiva ne’ebé sei partisipa iha eventu internasionál ASIAN Games Aichi–Nagoya, Japaun  2026 ne’e kompostu husi Taekwondo, Atletizmu, Swimming, Voley Praia, Halterofilismo, power lifting ho archeri.

Jornalista: Marito da Costa