Ministru José Honório Konfirma CFP Hahú Investiga Kazu Asédiu Seksual Ne’ebé Deskonfia Komete husi Dosente MFB iha UNTL

Ministru Ensinu Superior, Siénsia no Kultura (MESSC, sigla portugés), José Honório da Costa Pereira Jerónimo. Imajen/Média MESSC

DILI, RAFA.tl – Ministru Ensinu Superior, Siénsia no Kultura (MESSC, sigla portugés), José Honório da Costa Pereira Jerónimo, hateten  Komisaun Funsaun Públika (CFP, sigla Portugés) hahú halo ona investigasaun ba dosente  ho insiál MFB ne’ebé deskofia prátika asédiu seksual hasoru estudante ativu no la ativu balun husi Departamentu Polítika Públika, Fakuldade Siénsia Sosiál iha Universidade Nasional Timor Lorosa’e  (UNTL).

Notísia Relevante: FONGTIL husu CFP Aselera Karta Suspensaun Ba Dosente MFB Ne’ebé Alegadu Prátika Asédiu Seksual iha UNTL

“Se investigasaun Komisaun Funsaun Públika nian mak hatudu katak evidénsia ne’e forte, sei iha suspensaun ba dosente MFB no Universidade Nasional Timor Lorosa’e, ne’ebé Professor hanorin ba tenke simu desijaun hotu ne’ebé mai husi Komisaun Funsaun Públika,” Ministru José Honório da Costa Pereira Jerónimo, ba jornalista sira iha Palásiu Governu, Kuarta (15/10/2025).

Governante ne’e bolu ona estrutura estudante UNTL, Reitor, Vise-Reitor, pro-reitor, dekanu sira hodi inkontru urjentemente ba kazu asédiu seksual iha fakuldade siénsia sosiais, UNTL.

Nia afirma hanesan Ministru tutela ba ensinu superiór, halo ona  intervensaun no husu atu halo investigasaun ida kle’an tanba asédiu seksual, la’os akontese de’it iha fakuldade siénsia sosiál, maibé mos iha fakuldade ekonomia, Medisina no Saúde.

“Informasaun ne’ebé dekanu ekonómia fó ba sira ha’u  rezolve tiha ona ho família, nia mai fali ona hanorin, profesór ne’e rasik sira la fó ona kargu, iha Fakuldade Medisina xefe departamentu rasik nia labele ona asume kargu, prosesu investigasaun ba ona iha Komisaun Funsaun Públika. Ita hein desizaun  husi Funsaun Públika,” Nia subliña.

Ministru José Honório da Costa Pereira Jerónimo  husu ba dosente sira hotu, atu respeita estudante feto sira, ne’ebé labele uza interese haruka estudante sira atu ba halo traballu iha dosente sira nia uma.

Nia mós husu atu dosente sira labele orienta estudante sira iha uma,  restaurante, no kualker fatin, estudante ne’e orienta iha universidade, fakuldade no departamentu.

Apelu ba profesór sira hotu ne’ebé hanorin iha Institutu ka Universidade, favor boot ida respeita estudante feto sira, ne’e importante, tanba prepara sira ba futuru lideransa iha Timor.

MESSC mós informa, dadaun ne’e prepara ona esbosu ida kona-bá kontra violénsia asédiu seksual novViolénsia doméstika atu halo diskusaun entre ministériu relevante sira, atu  implementa ba eskola  universitáriu sira ne’ebé eziste iha Timor Laran.

Nia subliña haruka juri sira estuda hela, parese atu halo Dekretu-Lei ida kona-ba asédiu seksual no violénsia seksual ne’e importante, diskusaun la’o hela, fo ba Ministériu Justisa ho Sekretáriu Estadu Igualdade Jéneru tenke haré, bele konvida mos sosiedade sivil sira, hanesan Timoroan tenke hakotu aktus ne’e.

Reportajen ekipa Rafa.tl