Destaque

Ministru José Honório Deklara Asédiu Seksuál iha UNTL La’ós De’it iha Fakuldade Siénsia Sosiál

todayOctober 8, 2025 1552 23 5

Background
share close

DILI, RAFA.tl – Ministru Ensinu Superiór, Siénsia no Kultura (MESSC, siglá portugés), José Honório da Costa Pereira Jerónimo, Kuarta (08/10/2025), deklara katak pratika asédiu seksuál iha Universidade Nasionál Timor Lorosa’e (UNTL) la’ós akontese de’it iha Fakuldade Siénsia Sosiál, maibé akontese mós iha Fakuldade Medisina no Fakuldade Ekonomia.

Notísia Relevante: RFTL-FOKUPERS ho JSMP husu Reitór UNTL Suspende Dosente MFB Ne’ebé Pratika Asédiu Seksuál

Ho fenomena ida-ne’e, Segunda  (13/10/2925),  Ministru José Honório da Costa Pereira Jerónimo sei halo  reuniaun ho Reitór UNTL,  João Soares Martins, estrutura  ho dekanu sira hodi rona direta sira-nia hanoin no husu tuir  prosesu investigasaun   husi  UNTL nian  to’o ona iha ne’ebé.

Ministru José Honório da Costa Pereira Jerónimo, ba jornalista sira iha Palásiu Guvernu, Dili Kuarta (08/10/2025), husu atu hakle’an prosesu investigasaun ba dosente MFB ne’ebé deskonfia halo asédiu seksuál hasoru estudante feto iha Universidade Nasionál Timor Lorosa’e (UNTL), nune’e bele hatudu evidénsia ida forte no autór tenke responsabiliza ba nia aktu ne’ebé komete.

Governante ne’e haktuir, antes ne’e MESSC ho UN WOMEN, Korea Internasional Cooperation Agency (KOICA) ho parseiru sira seluk halo lansamentu estratéjia  zero toleránsia asédiu seksuál iha ambiente  Ensinu Superiór sira iha Timor-Leste.

“Agora akontesimentu ne’ebé iha UNTL liu-liu iha fakuldade siénsia sosiál, ne’e akontesimentu ida ne’ebé grave,  tanba  ne’e  ténke iha investigasaun kle’an atu  hetan prova katak  Profesór sira envolve iha asédiu seksuál sira tenke bá hatan iha Tribunál,” Ministru José Honório da Costa Pereira Jerónimo afirma.

Nia husu ba estudante sira iha evidénsia forte, ténke  enkamiña  bá  Ministériu Públiku, hodi halo investigasaun   bá  kazu  sira hanesan ne’e, tanba instituisaun UNTL ne’e universidade públiku.

“Ha’u nia  apellu mak ne’e, estudante sira ne’ebé hetan abuzu seksuál ka hahalok aat hosi manorin  na’in ka profesór sira, ténke fó hatene maibé ténke iha evidensia ne’ebé forte, atu ita bele kombate prátika asédiu seksuál iha kampus,” Nia afirma.

Ministru José Honório mós husu ba dosente sira iha UNTL katak hanorin estudante konsidera hanesan oan sira, ténke respeita labarik feto sira, la bele  hanoin aat bá  estudante sira liu-liu feto sira tanba sira ne’e atu prepara bá futuru  líder bá nasaun ne’e.

Ministru  José Honório haktuir katak, bainhira kazu ne’e akontese no hetan protesta husi Estudante sira,  nia  telefone direita kedas ba Reitór atu  husu  halo investigasaun ida ne’ebé kle’an bá  kazu sira hanesan ne’e, tanba MESSC la permite prátika hahalok aat sira hanesan ne’e, tantu iha universidade públiku no mos privadu sira.

Governante ne’e mós apela bá universidade hotu-hotu, liu-liu ba estudante sira atu labele tauk ko’alia sai,  tanba  kazu ne’e akontese dala tolu ona. Nune’e mós husu ba UNTL bele fó sansaun disiplinar, tanba  evidénsia forte, bele lori bá Tribunál, la bele admite beibeik profesór ne’ebé hahalok la di’ak.

UNTL iha nia autonomia kampus, sira iha  podér tomak atu halo desizaun, Reitór kuandu lori bá konsellu disiplinar katak kazu ne’e gravee, la bele tollera ténke halo sansaun ruma  bá profesór ne’ebé komete krime ne’e.

Reportajen ekipa Rafa.tl

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!