Ministériu Saúde Sei Halo Promosaun Ba Profisionál Saúde iha Administrasaun Públika Hamutuk 2.016

Ministra Saúde, Elia A. A. dos Reis Amaral. Imajen/Rafa.tl

DILI, RAFA.tl– Ministériu Saúde (MS) sei halo promosaun ba profisionál saúde iha administrasaun públika hamutuk  na’in-2.016 atu valoriza sira no asegura rekoñesimentu ba sira-nia méritu no durasaun servisu nian.

Projetu Rezolusaun Governu ne’ebé aprezenta hosi Ministra Saúde, Elia A. A. dos Reis Amaral, Kuarta (08/10/2025), hetan mós aprovasaun iha Konsellu Ministru, ne’ebé estabelese númeru vaga ba promosaun pesoál ne’ebé halo parte hosi karreira profisionál saúde nian iha administrasaun públika.

Iha komunikadu ofisiál ne’ebé Rafa.tl asesu husi Gabinete Média Prezidénsia Konsellu Ministru, haktuir Ministériu Saúde estabelese ona vaga promosaun hamutuk 2.016 ne’ebé fahe entre karreira diferente, hanesan Karreira Médika ho total vaga 376; Karreira Enfermajen iha vaga 985; Karreira Parteira Profisionál hamutuk 293, no Karreira Tékniku Diagnóstiku, Terapéutika no Saúde Públika iha vaga 362.

Rezolusaun Governu nian, ne’ebé aprova tuir Dekretu-Lei nú. 31/2025, loron 24 fulan-Setembru, define númeru hosi vaga ba promosaun profisionál sira iha karreira médika, enfermajen, parteira profisionál no tékniku diagnóstiku, terapéutika no saúde públika, iha ámbitu rejime espesiál funsaun públika nian.

Medida ida-ne’e kumpre kompromisu Governu nian atu valoriza profisionál saúde sira no asegura rekoñesimentu ba sira-nia méritu no durasaun servisu nian hodi promove motivasaun, retensaun no estabilidade hosi kuadru sira-ne’e, ne’ebé kualifikadu tebes iha Servisu Nasionál Saúde nian.

Governu Aprova Formasaun Ba Karater Funsionáriu Públiku nian

Konsellu Ministru aprova mós projetu Rezolusaun Governu nian ne’ebé aprezenta hosi Ministru Prezidénsia Konsellu Ministrus, Agio Pereira, no Komisaun Funsaun Públika, kona-ba formasaun karater funsionáriu públiku nian.

Rezolusaun Governu ida-ne’e ho objetivu atu hametin étika, disiplina, lideransa no sentidu servisu públiku funsionáriu públiku hotu-hotu nian, hodi nune’e, bele promove Administrasaun Públika ida ne’ebé ho integridade, efisiénsia no kompromisu boot liubá valór sira Estadu nian.

Medida ne’e nu’udár parte hosi reforma ne’ebé la’o daudaun iha jestaun no dezenvolvimentu rekursu umanu ne’ebé prevee ona iha Programa Governu Konstitusionál da-9 nian, ne’ebé destaka importánsia formasaun nian nu’udar instrumentu esensiál atu hametin lideransa, transparénsia no responsabilizasaun iha setór públiku.

Formasaun ne’e kontínua no sei kobre komponente karakter, ierarkia no disiplina, sidadania, patriotizmu, no nasionalizmu nian, hodi haburas kultura respeitu institusionál, kumprimentu ba norma legál sira, no mós valorizasaun ba kna’ar funsionáriu públiku nian iha konstrusaun Estadu no dezenvolvimentu nasionál. Sei inklui mós modulus kona-ba abilidade profisionál sira, hanesan jestaun efisiente, serbisu iha ekipa no rezolve dezafiu no konflitu sira iha servisu públiku, no mós área relevante sira seluk..

Komisaun Funsaun Públika sei responsabiliza ba koordenasaun dezenvolvimentu kurríkulu no servisu hamutuk ho instituisaun relevante sira hodi determina fatin no kondisaun ba realizasaun formasaun. Partisipasaun hosi funsionáriu sira iha atividade sira-ne’e nu’udar komplementu obrigatóriu ida ba rejime formasaun no dezenvolvimentu profisionál ne’ebé daudaun ne’e vigora.

Reportajen ekipa Rafa.tl