MI Hatun Despaixu Ba PNTL Fó Seguransa Másimu Ba Komemorasaun Tinan-50 Proklamasaun Independénsia

Ministru Interiór (MI), Francisco da Costa Guterres. Imajen/Rafa.tl

DILI, RAFA.tl– Ministru Interiór (MI), Francisco da Costa Guterres, hatun ona despaixu ba Komandu Jerál Polísia Nasionál Timor-Leste (PNTL) hodi fó orientasaun ba Komandu Munisípiu ida-idak no mós Polísia unidade sira, atu fó seguransa másimu ba komemorasaun loron proklamasaun  independénsia ba dala-50 ne’ebé sei komemora iha teritóriu nasionál iha 28 Novembru 2025.

“Despaixu ha’u hasai tiha ona, ne’ebé Komandu Jerál PNTL atu implementa de’it. Sira halo servisu  hela, lalika preokupa ida, despaixu ba ona halo sira nia servisu. Sira sei fó apóiu  seguransa ba kada munisípiu sira. Díli, ita konsentra, tanba  ne’e mak númeru Polísia boot,”  Ministru Francisco da Costa Guterres, informa ba Jornalista sira bainhira partisipa debate OJE 2026 iha Parlamentu Nasionál,  Tersa (18/11/2025)

Ministru Interiór  ne’e hateten kona-ba transporte Ministériu Interiór sei komunika ho Ministériu Finansa hodi apóia tan Patrimóniu Estadu ba Polísia sira hodi utiliza fó seguransa ba komemorasaun loron Proklamasaun Independénsia 28 Novembru ne’e.

Dadauk ne’e membru Polísia ne’ebé ativu hala’o servisu hodi fó seguransa ba povu  iha terióriu Timor laran ne’e,  hamutuk 4000-resin.

Reportajen ekipa Rafa.tl