MI Haruka Ona Karta Ba Komandu PNTL Mantein Seguransa Pesoál Ba Eis-Titulár sira

Ministru Interiór, Francisco da Costa Guterres. Foto/Rafa.tl

DILI, RAFA.tl– Ministru Interiór (MI), Francisco da Costa Guterres, haruka ona despaixu ida ba Komandante Jerál Polísia Nasionál Timor-Leste (PNTL), Komisáriu Jerál Henrique da Costa, atu mantein Korpu Seguransa Pesoál (CSP, sigla portugés) ba eis-titulár sira.

Notísia Relevante: Prezidente Repúblika Promulga Lei Halakon Totál Pensaun Vitalisia ho Efeitu Retroativu

“Ha’u hakerek ona karta ba Komandu Jeral PNTL hodi mantein  lai seguransa CSP sira hodi hein desizaun governu nian, tanba iha lei ne’e fó loron 30 ba governu  atu prepara tranzisaun sira ne’e,”  Ministru Interiór Francisco da Costa Guterres ba jornalista sira iha Kuartel Jenerál F-FDTL, Fatuhada, Dili, Sesta (03/10/2025).

Ministru Interiór esplika tanba eis-titulár sira mesak fundadór nasaun, veteranu no luta nain ba Timor-Leste nia indepedénsia, tanba ne’e hanesan membru Governu ne’ebé trata ba asuntu ne’e mantein seguransa ba sira.

Eis-titulár sira hanesan eis-Primeiru-Ministru Mari Alkatiri, eis-Prezidenti Republika, Francisco Guterres Lú-Olo, eis-Prezidenti Republika Taur Matan Ruak, ho tan eis Prezidente Parlamentu Nasionál Vicente Guterres no eis-Prezidente Tribunál Rekursu, Deolindo dos Santos, sira ne’e uluk mesak veteranu, lidera funu ne’e, atu mate no terus ba rai ida ne’e. Tanba ne’e, Hakarak ka lakoi  mantein seguransa ba sira.

Ministru Interiór Francisco da Costa Guterres, informa governu agora prepara hela ninia prosesu tranzisaun depois desizaun governu nian sai sei re-organiza halo fali despaixu ida hodi bele implementa  buat ne’ebé governu foti.

Reportajen ekipa Rafa.tl