MI Hahú Halo Selesaun Ba Offisiál Superiór PNTL Na’in-Haat Ba Kargu Komandante Jerál no Segundu Komandante

Ministru Interiór, Francisco da Costa Guterres. Imajen/Rafa.tl

DILI, RAFA.tl– Ministériu Interiór hahú halo selesaun ba superiór Polísia Nasionál Timor-Leste (PNTL) na’in-haat ne’ebé sei prienxe vaga rua ba kargu Komandante Jerál no Segundu Komandante molok aprezenta ba Konsellu Ministru hodi nomeia tuir lei.

“Ita agora dau-dauk halo hela selesaun ba sira, selesaun hotu tiha mak ha’u lori mai iha Konsellu Ministru hodi husu halo aprovasaun, selesaun ne’e seidauk to’o pakote, imi husu tiha ona ha’u mós hakfodak, ha’u seidauk bele temi sai ofisiais na’in hira, maibé iha nain-rua ka tolu no haat, ita haré ba para  halo selesaun to’ok ba sira,” Ministru Interiór, Francisco da Costa Guterres hateten hodi responde Jornalista sira hafoin enkontru Konsellu Ministru iha Palásiu Governu, Kuarta (11/02/2026).

Ministru Interiór Francisco da Costa Guterres, seidauk bele fó sai Ofisiál Superiór na’in-haat ne’e nia identidade ba iha públiku tanba sei iha hela prosesu selesaun.

“Ami sei halo hela, ha’u seidauk bele ko’alia, ita haré to’ok, mais prosesu la’o ona, depois to’o tempu sei lori mai iha Konsellu Ministru,  kuandu aprova ona ha’u informa ba imi,” Ministru Francisco da Costa Guterres tenik.

Ministru Interiór informa, Governu sei eskolla Ofisiál Superiór sira ne’ebé ho lideransa di’ak no mós iha kapasidade hodi lidera Instituisaun PNTL nian.

Ministru Interiór promete sei promove  Ofisiál Superiór sira husi  Superintendente Assistente ba to’o Superintendente Xefe iha fulan ne’e.

“Ami sei halo hela ninia justifikasaun hotu, ninia modelu promosaun, ami sei halo promosaun ba sira, promosaun hotu tiha maka ita bele halo eskolla ba sira.  Ami espera katak iha fulan-Fevereiru ne’e hotu, ita bele iha ona rezultadu ba ida ne’e, Ofisiál Superiór sira ne’ebé seidauk promovidu ne’e pratikamente barak, sira hamutuk na’in-50, ha’u sei anúnsia ba imi,” Ministru Francisco Guterres hateten.

Informasaun ne’ebé Rafa.tl asesa husi fontes iha Komandu Jerál PNTL nian katak daudaun ne’e iha pakote rua maka sei kompete ba Komandante Jerál PNTL foun ho segundu Komandante Jerál.

Naran sira ne’ebé sai hanesan diskusaun iha komandu jeral PNTL mka hanesan Superintendente Xefe Jorge Nelson Amado Monteiro hamutuk Superintendente Xefe Orlando Gomes (pakote ida), no pakote  seluk mak  Superintendente Xefe Afonso dos Santos hamutuk ho Superintendente Xefe Justinho Menezes.

Iha loron 15 fulan-Marsu tinan 2023, Konsellu Ministru (KM)  aprova projetu Rezolusaun Governu, hodi halo nomeasaun ba Superintendente-Xefe Henrique da Costa hodi ezerse kargu Komandante-Jerál Polísia Nasionál Timor-Leste (PNTL) no Superintendente-Xefe Pedro Belo  nu’udár Segundu Komandante-Jerál PNTL ba períodu tinan tolu (2023-2026), ho nune’e, promove bá  Komisáriu-Jerál PNTL.

Reportajen Ekipa Rafa.tl