MI Ameasa Aplika Sansaun Rigorozu Hasoru Superintendente Asistente AQ ne’ebé Deskonfia Falsifika Dokumentu Veteranu

Ministru Interiór (MI), Francisco da Costa Guterres. Imajen/Rafa.tl

DILI, RAFA.tl – Ministru Interiór (MI), Francisco da Costa Guterres, hatún ona despaixu ba Komandu Jerál Polísia Nasionál Timor-Leste (PNTL) atu hakle’an investigasaun ba Superintendente Asistente Polísia AQ ne’ebé deskonfia falsifika dokumentu veteranu hodi hetan grau 8 a 14.

Notísia Relevante: Deskonfia, Superintendente Asistente Polísia AQ Falsifika Dokumentu Veteranu hodi Hetan Grau 8 a 14

Ministru Interiór, Francisco da Costa Guterres ba jornalista sira iha Parlamentu Nasionál (PN), Kinta (13/11/2025) hateten, bainhira iha prosesu investigasaun mak hetan duni katak iha duni falsifikasaun dokumentu veteranu, parte Ministériu Interiór sei foti medida hodi aplika sansaun rigorozu hasoru membru Polísia ne’e.

“Investiga lai, sei lori ba Tribunál maka deside nia sala, iha medida forte ba nia, tanba asuntu ida importante teb-tebes sira falsifika, ita tenke revé fila-fali estatutu hotu, bele to’o iha sansaun ne’ebe todan liu, agora depende ba tribunál. Haruka despaixu ba komandu Jerál PNTL ne’e atu estabelese investigasaun depois liga ho tribunál para hare,” Ministru Francisco da Costa Guterres hateten.

Governante ne’e esplika, despaixu haruka ba Komandu Jerál PNTL atu loke prosesu investigasaun hasoru membru Polísia ne’ebé deskonfia falsifika dokumentu veteranu.

“Ha’u labele dehan na’in hira, saida mak loos, ita hahú ona prosesu ne’ebé tenta ona haré, kuandu tribunál deside ona medida sei foti hasoru ema ne’e. Ne’ebé ita sei iha prezunsaun inosénsia,” Ministru Interiór ne’e tenik.

Iha fatin seluk, Portavóz Interinu Komandu Jerál PNTL, Superintendente Asistente Polísia Mouzinho T. Correia konfirma katak iha duni despaixu husi Komandu Jerál PNTL atu halo investigasaun ba membru Polísia Superintendente ho inisiál AQ ne’e.

Nia afirma, diresaun Servisu Investigasaun Kriminál la simu despaixu dehan, ema na’in-rua, maibé iha de’it keixa hasoru membru PNTL ida de’it, deskonfia halo falsifikasaun ba dokumentu veteranu nian.

“Prosesu la’o hela, maibé ita rekolla informasaun hotu-hotu. Liu-liu testemuña sira ne’ebé hato’o informasaun na’in rua ne’e Lalós, despaixu ne’ebé ami simu ne’e ema ida de’it, nia naran iha despaixu.” Superintendente Asistente Polísia Mouzinho T. Correia hateten.

Reportajen ekipa Rafa.tl