Messi Lori Arjentina Avansa Ba Faze 32 Hafoin Marka Golu Rua Kontra Áustria

Jogadór sira selesaun Arjentina nian selebra sira nia triunfu hasoru Áustria no kualifika ba faze tuirmai. Imajen/EFE

Díli, 23 Juñu 2026 (RAFA.TL)- Jogadór estrella Arjentina Leonel Messi lori nia ekipa Arjentina avansa ba faze 32 hafoin halakon Áustria iha jogu grupu J Kopa Mundiál 2026, iha Estádiu AT&T, Arlington, Segunda (22/06/2026).

Vitória hosi selesaun nasionál Arjentina kontra Áustria mai husi golu rua ne’ebé marka husi Leonel Messi iha primeira no segunda parte.

Vitória ida-ne’e tau Arjentina ho konfortavel iha primeiru klasifikasaun grupu J hosi Kopa Mundiál 2026 ho pontu neen hosi jogu rua.  Nune’e, Áustria tuur iha segundu klasifikasaun ho ho pontu tolu hosi jogu rua.

Arjentina iha oportunidade osan-mean hodi marka golu dahuluk, liu husi penalidade ida hafoin avansadu Lautaro Martinez hetan falta iha área penalidade nian.

Lionel Messi, ne’ebé hakat ba oin hodi foti penalti, la konsege marka golu tanba hetan salva husi baliza Austría.

Arjentina kontinua halo jogu ho dominante tebes no hetan vantajen barak, inklui suta ida hosi Enzo Fernandez ne’ebé hetan blokeiu hosi guarda-rede Austría Alexander Schlager.

Tama ba minutu 38 Leonel Messi rekopera fali nia failansau iha penalidade ne’e ho golu ida hafoin aproveita pasajen ida hosi Facundo Medina iha minutu hodi marka golu no muda score ba 1-0.

Tama ba segunda parte, Áustria kria oportunidade hodi halo empata liuhosi bola livre husi Marcel Sabitzer, ne’ebé salva husi guarda rede Arjentina nian, Emiliano Martinez.

Ekipa rua  hahú halo jogu ida ho kontra atake maka’ás, maibé Arjentina  domina bola no halo pasajen badak husi ain ba ain hodi lansa kontra atake ne´ebé lais.

Messi iha oportunidade hodi marka golu daruak, maibé nia pasajen la konsege másimiza hosi Nicolas Gonzalez, no ekipa rua kontinua lansa kontra atake, maibé ekipa rua ne’e laiha golu ida to’o tempu adisionál.

Iha tempu estra segunda parte nian, Leonel Messi aumenta tan nia golu iha tabela score hafoin konverte bola barullu iha área penalidade adversáriu nian iha minutu 90+5 hodi muda score ba 2-0.

To’o jogu termina, ekipa Arjentina mantein lidera ho score 2-0 no asegura ona billete ida ba faze eliminasaun iha jornada 32 nian.

Jornalista: Davilio Valdemir/Editór: Vito Salvadór