Messi Hattrick Lori La Albiceleste Manan Arjélia ho Score 3-0

Jogadór estrela Argentina (La Albiceleste), Leonel Messi marka hattrick iha jogu dahuluk kontra Arjélia iha Kopa Mundiál 2026.

Díli, 17 Juñu 2026, (RAFA.TL)- Jogadór estrela Argentina (La Albiceleste), Leonel Messi marka hattrick iha jogu dahuluk kontra Arjélia no lori Argentina rekolla pontu tolu iha jogu kontinuasaun faze grupu Kopa Mundiál 2026.

Jogu entre nasaun rua ne’ebé hala’o iha Estádiu Kansas City, Kuarta (17/06/2026), ekipa Argentina domina kedas jogu hodi fó presaun ba Arjélia, maibé ekipa Arjélia óos kontinua halo balansu no lansa  kontra atake liu husi oportunidade ne’ebé iha.

Argentina konsege lidera ho score 1-0 iha minutu 18 liu hosi golu ne’ebé Leonel Messi marka hafoin simu pasajen hosi Rodrigo De Paul hodi lansa suta direta ba baliza no guarda rede Arjélia la konsge antisipa.

Argentina kontinua domina bola, no lansa kontra atake liu husi kombinasaun jogu ne’ebé kapas, enkuantu Arjélia joga iha de’it nia área hodi hein bola oportunidade no lansa kontra atake.  Tama ba minutu 41, Arjélia hetan oportunidade di’ak maibé remata ida iha grande área konsege salva husi baliza Argentina Emiliano Martínez.

Atake tuir mai husi Arjélia defeza Argentina mantein solidu hodi la fó fatin, ho nune’e, to’o termina jogu primeira parte score mantein 1-0.

Depois intervallu, Arjélia koko atu muda situasaun, maibé Argentina kria ameasa fila-fali, ho atake hosi parte loos ne’ebé remata husi Messi hafoin drible ida, maibé bola seidauk kona alvu.

Argentina kontinua hetan oportunidade ida, hafoin Enzo Fernández manán duelu no pasa ba Lautaro Martínez iha grande área, maibé sutu hosi Lautaro konsege antisipa ho di’ak husi Luca Zidane.

Gol daruak husi Argentina akontese iha minutu 60 liu hosi Leonel Messi hafoin kontra atake lais no pasajen hosi Julián Álvarez hosi parte karuk, no Alexis Mac Allister remata forte hosi grande área liur, ne’ebé konsege blokeia hosi guarda rede no Messi aproveita bola rebound no remata ho ain loos, marka golu ida tan hodi muda aumenta score ba 2-0

Messi ikus mai kompleta nia hattrick iha minutu 77 hafoin halo kombinasaun ho Nicolás González, no remate ho ain karuk hosi oin besik grande area la konsege antisipa ho diak hosi guarda rede Zidane.

Arjélia tenta lansa mós kontra atake iha minutu ikus, no sutu livre hosi joadór Riyad Mahrez la kona alvu tanba sei hetan satan husi jogadór Argentina sira iha liña oin.

Ho rezultadu vitória ne´e, hatuur armada La Albiceleste iha pozisaun dahuluk kopa mundiál 2026 iha grupu J ho pontus tolu.

Grupu J kompostu husi nasaun haat, mak hanesan Argentina Arjélia, Austria no Jordania.

Jornalista: Davilio Valdemir/Editór: Vito Salvadór