Mbappe Marka Golu Rua Lori Les Bleus Manan Senegal 3-1

Mbappé selebra golu Fransa nian hasoru Senegal iha Kopa Mundiál 2026 Imajen/Getty

Díli 17 Juñu 2026 (RAFA.TL)- Selesaun Franseza hala’o sira nia jogu dahuluk iha Kopa Mundiál 2026 ho rezultadu ne’ebé perfeitu. Les Bleus  ka Fransa manan Senegal ho score 3-1, hafoin Kylian Mbappé marka golu rua.

Jogu entre Fransa no Senegal hosi Grupu I hala’o iha Estádiu Nova Iorke, Nova Jersey, Kuarta (17/06/2026),  Fransa marka golu iha segunda parte liu husi Kylian Mbappé no Bradley Barcola entertantu Senegal responde liu Ibrahim Mbaye iha tempu estra segunda parte.

Iha primeiru parte, ekipa rua hahú sira nia jogu nakloke, no Senegal halo kontra atake maka’ás dahuluk  hakarak koleta golu, maibé liña defensivu adversariu sei bele antrisipa no hasai bola.

Senegal kontinua halo presaun  no tama ba minutu 25, jogadór Nicolas Jackson halo sutu maka’ás, maibé bola sei kona besi-riin leten.

Fransa mós koko halo atake ida lalais, no halo mós presaun, maibé sira hetan difikuldade atu sobu liña defensive Senegal, nune’e to’o minute 45 ramata, ekipa rua lakonsege kolleta golu ba malu.

Kontinua iha segunda parte, ekipa Fransa hasa’e liután sira intensidade jogu, nune’e oportunidade dahuluk sira hetan iha minutu 58, hafoin Sadio mane hamonu Kylian Mbappe iha grande área, nune’e  Fransa ho esperansa hetan prezente penalidade, maibé arbitu deside laiha penalty hafoin haré hikas VAR.

Jogu kontinua la’o no Fransa ikus mai hetan oportunidade lolos bainhira tama ba minutu 66 liu husi jogadór Kyllian Mbappe.

Jogadór husi Real Madrid ne’e simu ho di’ak bola ne’ebé passa husi Michael Olise no la konsege salva husi guarda rede Senegar, nune’e Fransa lidera 1-0.

Ho golu ida ne’e Fransa kontinua halo presaun. Iha oportunidade daruak akontese tan golu hodi lori Fransa lidera ho score 2-0 iha minute 82 liuhusi jogadór substituisaun Bradley Barcola.

Maske derrota golu rua, Senegal nafatin ho ritmu ne’ebé antes ne’e iha.

Liuhusi pasajen bola aas husi defensivu ba avansadu Senegal konsege hamihis score sai 2-1 iha injury time, liuhusi jogador ibrahim Mbaye.

Liu deit minutu balu, Fransa responde kedas. Jogadór Kyllian Mbappe produtivu  liuhusi nia individu ne’ebe iha, hodi husik nia suta dook ne’ebé labele salva husi guarda rede Senegal. Jogu ramata ho vitóri aba Fransa ho score 3-1.

 Jornalista: Marito da Costa/Editór: Vito Salvadór