Mbappe Marka Golu Rua Hodi Lori Les Bleus Hakat Ba Faze 32

Avansadu estrela hosi selesaun franseza Kylian Mbappé .

Díli, 23 Juñu 2026 (RAFA.TL)-Avansadu estrela hosi selesaun franseza Kylian Mbappé marka golu rua hodi lori Fransa  ka Les Bleus hakat ba faze 32 iha Kopa Mundiál 2026.

Jogu entre Fransa no Irake hosi grupu I, ne’ebé halao iha Estádiu Lincoln Financial Field, iha Filadélfia, Estadus Unidus, Tersa (23/06/2026), Fransa joga kedas ho agresivu hahú hosi apitu abertura nian no foin minutu ida de’it iha jogu hahú Fransa tenta ona marka golu, maibé esforsu sira  la konsege muda produs score.

Presaun aumenta iha liuhosi Ousmane Dembele, Michael Olise, no Kylian Mbappé ne’ebé hatudu jogu ida ho agresivu los maibé, Irake kaer metin no halo auto defeza ida metin hodi asegura sira nia rede husi atake sira ne´ebé iha.

Tama ba minutu 14 Kylian Mbappé marka golu ida ba nia ekipa hodi muda score ba 1-0 hafoin  simu bola pasajen husi nia kompatriota Olise.

Irake koko atu hatán, maibé, Graham Arnold nia ekipa hetan problema bainhira avansadu prinsipál Aymen Hussein hetan kanek no tenke troka iha minutu 26.

Ali Al-Hamadi, ne’ebé tama hanesan suplente, fó impaktu imediatu, hodi kria tentativa rua iha baliza ba ekipa franseza no fó ameasa maka’as ba defeza Les Bleus nian.

Tama ba finál primeira parte, jogu ne’e maka’as tebes, ho falta barak ne’ebé komete hosi ekipa rua ne’e, antes árbitru ikus huu apitu hodi hakotu primeira parte no Fransa mantein lidera ho score 1-0.

Tama ba Segunda parte, ekipa rua tenke atrazu iha jogu tamba klima ne´ebé la permite. No Bainhira jogu hahú fali, Fransa hetan fali kontrolu liu husi Bradley Barcola ameasa baliza irakianu ho tentativa iha minutu 53 no Presaun ne’e ikusmai rezulta iha golu ida Iha minutu 54, liu husi Mbappé hodi muda score ba 2-0.

Ho golu rua, Irake koko atu hetan fali momentum ho substituisaun oioin. Treinadór irakianu Graham Arnold lori Youssef Amyn no Rebin Sulaka hodi aumenta enerjia foun ba kampu. Maibé, Fransa kontinua lansa amisa liutan.

Fransa lansa tan atake sira iha segunda parte nia klaran, ho Olise, Dembele, no Adrien Rabiot ne’ebé troka malu hodi koko guarda-rede Ahmed Basil. No Golu datoluk ikus mai mosu iha minutu 66. Hafoin série presaun ne’ebé rezulta iha kantu oioin, Dembele ho susesu aproveita pasajen Olise nian hodi halakon guarda-rede Irake nian no muda score sai 3-0.

Hafoin golu, tékniku fransés halo rotasaun oioin, hodi hasai Olise no Dembele no hatama fali Rayan Cherki no Desire Doue hodi mantein ekipa nia intensidade.

Irake la rende ho fasil. Sira manan kantu liuhosi Zidane Iqbal, ne’ebé lori ba oportunidade rua tuituir malu ba Rebin Sulaka no Ali Al-Hamadi maibé, sira nia remata ne’ebé ladún di’ak impede sira atu marka golu.

Mbappé kontinua fó ameasa ba defeza Irake nian, no avansadu ho tinan 27 ne’e rejista tentativa adisionál oioin iha minutu ikus sira molok jogu termina. To’o apitu finál, score mantén 3-0 ba Fransa, hodi hametin sira nia pozisaun iha grupu I.

 Jornalista: Marito da Costa/Editór: Vito Salvadór