Desporto

Maudoko F.C ho São Francisco Xavier Empate 4-4

todayNovember 16, 2026 18

Background
share close

Díli, 16 Novembru 2026 (RAFA) -Liga Futsal Primeira Divizaun ne’ebé hala’o iha Kampu Futsal F-FDTL iha Díli, tama ona ba jornada da-sia. Maudoko F.C no São Francisco Xavier hatudu forsa hanesan, hafoin ekipa rua remata jogu ho rezultadu empate 4-4.

Jogu iha Domingu-ne’e, ekipa rua hatudu jogu intensivu no buka atu kria oportunidade. Maibé, São Francisco Xavier loke uluk rezultadu liuhusi jogador João Lopes iha minutu 10, hodi lori ekipa lidera 1-0.

La kleur de’it, Maudoko F.C responde liuhusi Iqbal Alifefan, ne’ebé konsege halo golu empate no muda rezultadu sai 1-1.

Liu de’it minutu ida, São Francisco Xavier fila-fali lidera rezultadu liuhusi Lourenço Oliveira, ne’ebé marka golu ba segunda vez no muda rezultadu sai 2-1.

Maski hela iha pozisaun lakon golu ida, Maudoko F.C kontinua esforsu atu buka golu empate. Ekipa ne’e halo presaun no kontra-atake, maibé to’o primeira parte remata, rezultadu nafatin 2-1 ba São Francisco Xavier.

Tama ba segunda parte, Maudoko F.C aumenta tan intensidade jogu no konsege hetan golu empata liuhusi Flaviano Alves iha minutu 26, hodi muda rezultadu sai 2-2.

Iha minutu 27, Lourenço Oliveira marka tan golu hodi lori São Francisco Xavier lidera fali 3-2, Maibe Maudoko F.C  kontinua buka dalan atu empata, to’o Danilo Pinto konsege marka golu ba empata 3-3.

Iha minutu 32, Maudoko F.C hetan oportunidade hodi ezekuta Second penalidade hafoin jogador São Francisco Xavier halo falta ba nia adversáriu. Danilo Pinto ne’ebé foti responsabilidade, konsege ezekuta ho susesu no lori Maudoko F.C lidera fali rezultadu 4-3.

Vantajen ne’e la dura kleur, iha minutu 35 São Francisco Xavier konsege halo golu empata liuhusi Zenon da Silva, hodi muda rezultadu sai 4-4. Rezultadu ne’e nafatin to’o árbitru hakotu jogu iha segunda parte.

Ho rezultadu empate 4-4 ne’e, ekipa rua fahe malu pontu ida. Maudoko FC agora rekolla ona pontu 17, enkuantu São Francisco Xavier hametin nia pozisaun ho pontu 14 iha tabela klasifikasaun.

Jornalista: Marito da Costa

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!