Manán iha Penalidade, Suisa Hakat Ba Kuartu-Finál Kopa Munidál 2026

Suisa vs Kolómbia. Imajen/REUTERS

Díli, 08 Jullu 2026 (RAFA.TL)- Ekipa Selesaun Nasioál Suisa hakat ba kuartu-finál Kopa Mundiál 2026  hafoin halakon   nia adversáriu Kolómbia  liu husi penalidade ho score 4-3.

Jogu ekipa selesaun nasionál rua; Suisa ho Kolómbia ne’ebé hala’o iha Estádiu BC Place iha Vancouver, Kanadá, kuarta-ne’e,  jogadór sira Kolómbia tenta atu halo kedas atake ida liu husi jopgadór Luis Diaz  ne’ebé halo kruzamentu ho kualidade ba área penalti, maibé defeza adversáriu interseta no asegura ho di’ak.

Iha minutu haat, jogadór suísu Denis Zakaria koko atu pasa ba kolega husi área penalti nia liur, maibé defeza adversária halo reasaun lalais hodi kontra atake.

Kolómbia iha oportunidade iha minutu 21, Gustavo Puerta lansa suta ida ne’ebé maka’as hosi área penalidade nia rohan; nia esforsu perigozu ba poste loos hetan blokeiu hosi guarda-rede Gregor Kobel, ne’ebé maka halo salvasaun.

Suisa kria oportunidade iha minutu 30. Fabian Rieder tama iha área penalidade nian no tiru ba sentru baliza nian, maibé guarda-rede hapara tentativa no score mantein 0-0 to’o intervalu.

Iha inísiu husi segunda parte, jogadór Suisa Djibril Sow halo tentativa ida ne’ebé ambisiozu, ho pozisaun ne´ebé di’ak hafoin simu pasajen iha área penalti nia laran no lansa kedas sutu direita ba baliza, maibé bola semo aas liu deit husi poste lete iha minutu 48.

Kolómbia iha oportunidade iha minutu 60, Luis Díaz halai ho bola liuhosi defeza na’in-rua no lansa suta direita maibé guarda-rede Gregor Kobel halo salvasaun ne’ebé di’ak.

Eskoru mantein 0-0 to’o apitu finál, hodi haruka jogu ba tempu adisionál. Iha inísiu períodu adisionál, Kolómbia ameasa baliza Suísa ho kabesa ida hosi Lucumi, ne’ebé halo ligasaun ho kruzamentu ida ne’ebé presiza, maibé bola kona baliza. Liña markadór nian la muda to’o tempu adisionál nia rohan, hodi obriga ba penalidade.

Iha penalidade, Kolombia nia jogadór na’in-rua falla marka golu hanesan Davinson Sanchez no Cucho Hernández entertantu Suisa falla deit penalidade ida liu husi Manuel Akanji, ho nune´e Suisa hakat ba Kuartu-Finál hafoin manan penalidade ho score 4-3. Iha kuartu-finál Suisa sei enfrenta nia advresáriu Arjentina.

Jornalista: David Gonçalves/Editór: Vito Salvadór