Manán Fransa 0-2, Ekipa La Furia Roja Hakat Ba Finál Kopa Mundiál 2026

Mikel Merino hosi España marka golu. Imajen/REUTERS

Díli, 15  Jullu  2026 (RAFA.TL)- Ekipa Selesaun Nasionál España (La Furia Roja) hakat ba finaál  Kopa Mundiál 2026 hafoin halakon adversáriu Fransa (Les Bleus) ho score 2-0 iha jogu meia-finál ne’ebé hala’o iha Estádiu AT&T, iha Arlington, Tersa-ne’e.

Golu vitória husi ekipa La Furia Roja marka hosi Mikel Oyarzabal no Pedro Porro iha primeira no segunda parte, enkuantu ekipa Les Bleus la responde golu ruma no sofre derrota ho scor 2-0.

Ekipa rua ne’e joga ho jogu ida nakloke desde inísiu, maibé seidauk kria oportunidade perigozu ruma.

España iha oportunidade osan-mean ida hodi lidera hafoin hetan penalidade hafoin falta ida hosi Lucas Digne hasoru Lamine Yamal iha kaixa laran.

Mikel Oyarzabal hakat ba oin hodi foti penalidade ne’e no ho susesu marka golu iha minutu 22 hodi muda score ba 1-0.

Hafoin golu ne’e ekipa Les Bleus tenta halo balansu hodi buka atu marka golu atu halo empata maibé sei nafatin falla no oportunidade laiha.

España kontinua hetan oportunidade atu duplika sira nia vantajen, maibé suta ida hosi sira nia jogadór ida hetan blokeiu hosi defeza franseza.

Ekipa rua mantein iha balansu, no Fransa kontinua buka halo ameasa sira no tenta atu halo empata, maibé score mantein 1-0 ba España to’o intervallu.

Tama ba jogu segunda parte, España kontinua halo jogu badak husi ain ba ain hodi domina bola no halo ekipa Fransa tenke esforsu atu halo balansu ba jogu ne’e.

Tama ba minutu 58, ekipa La Furia Roja ikus mai duplika sira nia golu liu husi jogadór Pedro Porro ne´ebé konverte pasajen husi Dani Olmo no marka golu furak ida ba nia ekipa hodi muda score ba 2-0.

Hafoin golu ne’e, ekipa España kontinua domina bola no jogadór Lamine Yamal marka tan golu ida maibé arbitu la autoriza tanba offside.

Tama ba minutu ikus sira jogu segunda parte nian, ekipa Fransa kontinua koko no lansa atake sira atu bele halo golu ruma hodi buka oportunidade ba empata, maibé España jogu ho defeza lima hodi asegura vitória ne’ebé iha no to’o jogu termina ekipa La Furi Roja mantein lidera ho score 2-0.

Ho vitória ne´e, España hakat ba finál hodi hasoru vensedór hosi jogu meia-finál seluk entre Inglaterra ho Arjentina, enkuantu Fransa sei joga iha play-off ba terseiru lugar.

 Jornalista: David Gonçalves/Editór: Vito Salvadór