Maioria Loja Sira iha Díli Koloka Ona Pesoál Estasionamentu

Sirkular PNTL ho DNTT ba loja sira iha Dili laran atu koloka pesoál estasionamentu iha loja oin sira hodi evita engarafamentu. Imajen/Rapro

DILI, RAFA.tl- Maioria loja sira ihaDíli laran hahú koloka ona pesoál  estasionamentu hodi organiza motór no karreta sira ne’ebé kompradór sira lori ba para iha loja oin, nune’e minimiza engrafamentu no garante ordenamentu tránzitu tuir regra no lei ne’ebé vigóra.

Notísia Relevante: POLTRANS Husu Loja Sira iha Dili Koloka Guarda Parajen Hodi Regula Transporte no Evita Engrafamentu

Iha sirkular konjunta, Polísia Nasionál Timor-Leste (PNTL), liu husi Diresaun Tránzitu Seguransa Rodoviária ho Ministériu Transporte no Telekomunikasaun (MTK), liu husi Diresaun Nasionál Transporte Terestre (DNTT) ho loja na’in iha loron 15 fulan-Abríl 2025, ho objetivu atu garante ordenamentu estasionamentu iha ida-idak nia loja oin.

Iha sirkular konjunta ne’e PNTL no DNTT mós subliña katak bainhira vizitór sira ba halo kompras no haré ba engarafamentu ne’ebé mak sempre akontese iha loja sira, tanba ne’e, Diresaun Nasionál Transporte no Terrestre hamutuk ho Diresaun Tránzitu Seguransa Rodoviária hato’o ba loja na’in hotu iha kapitál Díli atu rekruta pesoál, hodi nune’e, bele organiza estasionamentu, no husu atu tau marka ba estasionamentu karreta ho motór iha loja oin.

Ba loja sira ne’ebé iha ona pesoál estasionamentu tuir DNTT nia monitorizasaun seidauk organiza ho másimu, tanba ne’e DNTT hamutuk ho Diresaun Tránzitu Seguransa Rodoviária husu pesoál estasionamentu sira tenke organiza estasionamentu tuir marka ka liña ne’ebé iha; ba kompradór ka visitór labele estasiona viatura iha estrada ninin bainhira laiha ona espasu.

Traballadór iha loja balun iha área Hudi-Laran, Sérgio de Fátima de Oliveira, ba Rafa.tl hatete, sira ko’alia ona ho loja na’in atu tau pessoál parajen, nune’e bele organiza estasionamentu tuir saida mak mk DNTT no parte PNTL orienta.

“Ha’u traballadór husi loja ida ne’e, ami haruka ona ami nia ema ba, ami sei ko’alia ba ami nia loja na’in hodi monta fali ida ba seguransa hodi manda karreta ho motór, loja barak mak ami haré sira monta sira nia seguransa , loja barak mak seidauk, maibé ami sei ko’alia ba patraun hodi monta ema ida iha ne’e, manda karreta ho motór ne’ebé mai ho sasán sembako iha ne’e,” Sérgio de Fátima de Oliveira hateten.

Traballadór Loja Hadomi, Abrão Batista Ximenes hatete, sira nia loja aplika ona regra ne’ebé DNTT no PNTL liu husi Diresaun Tránzitu Seguransa Rodoviária hato’o.

“Ita hatete ba sira toos, ema barak liu maka mai hola sasán iha tempu loraik, ha’u haruka kareta para iha sorin, motór para tama mai loja oin. Ha’u manda karreta ho motór husi dadér tuku 08:00 – 21:00 kalan, ha’u mesak mak sai seguransa estasionamentu iha loja Hadomi,” Abrão Batista Ximenes hateten.

Iha observasaun direta ne’ebé Rafa.tl halo iha loja sira iha área Audian, Colmera, Kuluhun, bairu sentrál to’o Becora no Colmera, hatudu katak loja sira maioria koloka ona pesoál estasionamentu iha loja oin hodi organiza vizitante ka kompradór sira ne’ebé ba hola sasán iha loja sira.

Reportajen ekipa Rafa.tl