Liga Timorense Primeira Divizaun, Assalam F.C Halakon Coração F.C ho Score 2-1

Imajen/LFTL

Díli, 19 Juñu 2026 (RAFA.TL)- Assalam F.C susesu rekolla pontu tolu iha jogu kontinuasaun Liga Timorense Primeira Divizaun jornada da-toluk hafoin halakon nia adversáriu Coração F.C ho score 2-1.

Joga iha Estádiu Munisipál Díli, Sesta (19/06/2026), ekipa Assalam F.C sai hosi zona degradasaun no hatuur provizoriu iha pozisaun da-haat ho pontu haat, no kontinua hanehan Coração F.C ba zona degradasaun ne’ebé seidauk kolleta pontu husi jogu tolu ne’ebé mak hala’o ona.

Dezde jogu primeira parte, Assalam F.C domina kedas bola hodi lansa atake ba nia adversáriu Coração F.C.

Esforsu ne’e konsege fó rezultadu pozitivu iha minutu 19 liu hosi jogadór  Bonarudin Amin hodi lori ekipa Assalam FC lidera provizoriu ho score 1-0.

Ho score refere halo tensi jogu komesa manas liután ba ekipa rua ne’e hodi lansa kontra atake ba malu, maibé too termina jogu primeira parte score mantein ka la muda 1-0.

Kontinua ba jogu segunda parte tensi jogu komesa manas. Coração F.C ne’ebé mak sofre uluk golu ida iha primera parte tenta atu buka golu, maibé defeza hosi ekipa Assalam F.C mantein jogu ho disiplina no kontinua la fó fatin ba ekipa Coração atu marka golu.

Tama ba iha minutu 81, Norberto da Costa susesu lansa golu ida ba rede Coração FC ne’ebe mak hein hosi Georgino da Silva, hodi haboot liután score ba 2-0.

Sofre ona golu rua la hamate espíritu kompetetivu ekipa Coração F.C, ho nune’e, tama ba iha minutu 90+5 Coração F.C konsege responde golu ida liu hosi asaun Pascual Fernandes hodi hamihis score ba 2-1 to’o termina jogu segunda parte ho vitória ba Assalam F.C.

Jornalista: Marito da Costa-Davilio Valdamir/Editór: Vito Salvadór