Liga Timorense Primeira Divizaun, AS Marca vs Aitana F.C Empata 0-0

Jogu Aitana F.C ho AS Marca. Imajen/LFTL

Díli, 20 Juñu 2026 (RAFA.TL)- Ekipa AS Marca ho Aitana F.C fahe pontu hanesan iha jogu kontinuasaun Liga Timorense époka 2026 hafoin ekipa rua la marka golu ba malu durante mimutu 90 iha kampu laran.

Jogu kontinuasaun Liga Timorense ne’ebé hala’o iha Estádiu Munisipál Díli, Sábadu (20/06/2026), iha primera parte AS Marca ho Aitana F.C tun ho jogu ida agresivu no halo atake ba malu maka’ás hodi hadau malu atu lidera score.

Aitana FC hetan oportunidade dahuluk liuhusi jogadór Altun Yasin iha minutu 25, hafoin ho asaun individu lori bola husi liña sorin tama ba grande área adversáriu hodi lansa sutu direta ba baliza adversáriu, maibé sei salva husi jogadór adversáriu sira.

Liu deit minutu balu, Aitana F.C halo hikas ameasa liu husi jogadór Rui Soares ne’ebé lansa sutu direita hafoin dimu bola falta iha grande área laran maibé sei nafatin falla.

Tama ba minutu ikus jogu primeira parte atu ramata, ekipa As Marca mós hetan oportunidade liuhusi jogadór Oibo Godspower bainhira antispa bola krosing, maibé bola ne’ebé nia suta sei bele defende husi guarda rede. Nune’e ekipa Rua termina Sira Nia jogu primeira parte ho score 0-0

Kontinua ba segundu parte, AS Marca hasa’e tan sira nia intensidade jogu no konsege hetan oportunida. Jogadór  As Marca, Akanmidu Friday hodi husik sutu maka’ás maibé sei bele antisipa husi liña defensivu.

Ekipa rua kontinua halo atake maka’ás ba malu ho intensaun hakarak lidera jogu. As Marca ho Aitana ida-idak hetan oportunidade hodi halo ameasa ba malu maka’ás. Maibé, arbitu foti desizaun ikus hodi taka segundu parte, laiha golu ida mak akontese no score mantein 0-0.

Jornalista: Marito da Costa/Editór: Vito Salvadór