Liga Timorense, Makikit Laulara Halakon Matak Malirin 4-1

Jogadór sira Makikit Laulara selebra vitória hafoin halakon nia adversáriu Matak Malirin ho score 4-1, Sábadu 4 Jullu 2026.

Díli, 04 Jullu 2026 (RAFA.TL)- Ekipa AD SLB Laulara (Makikit Laulara) halakon nia adversáriu Karketu Díli F.C (Matak Malirin), ho score fantastiku 4-1.

Jogu kontinuasaun Liga Timorense époka 2026 ne’ebé hala’o iha Estádiu Munisipál Díli, Sábadu (04/07/2026), ekipa Makikit Laulara no Karketu Díli F.C halo jogu ho tensi ne’ebé aas no disiplina.  Maibé, ekipa AD SLB Laulara hetan uluk vantajen hodi lansa atake iha minutu tolu liu husi jogadór Italo Soares Pimentel.

Ho performa ne’ebé di’ak halo ekipa rua hasa’e liután intensidade jogu hodi halo kontra atake ba malu.

Makikit Laulara lansa uluk golu ida ba Karketu Díli F.C liu husi jogadór Italo Soares Pimentel iha minutu 11 hodi muda score ba 1-0, hafoin simu asisténsia bola kruza hosi nia kompatriota Mouzinho de Lima.

Ekipa AD SLB Laulara kontinua hasa’e ritmu jogu no Karketu Díli F.C mantein ho kalma hodi lansa mós kontra atake, maibé tama ba minutu 23 jogadór Italo Soares Pimentel marka tan golu ida hodi muda score ba 2-0.

Ekipa rua kontinu lansa kontra atake ba malu, maibé laiha tan golu ruma akontese no score iha tabela mantein too intervallu.

Tama ba jogu segunda parte, ekipa Matak Malirin  domina bola no halo jogu ida ho hodi lansa atake ba ekipa Makikit Laulara.

Esforsu ne’ebé Karketu Díli F.C iha ikus mai lori rezultadu iha minutu 53 hafoin jogadór Zenivio Mota lansa golu fantastiku ida husi área penalti liu husi liman karuk ne’ebé halo guarda rede AD SLB Laulara labele salva no score provizoriamente muda ba 2-1.

Ho golu ne’e halo animu jogadór Karketu Díli F.C nian sa’e hodi buka halo empata, maibé ekipa AD SLB Laulara tenta sai husi presaun no halo substituisaun ba jogadór iha liña klaran hodi hadia jogu no halo hikas atake ba adversáriu. Nune’e, ikus mai iha minutu 60, AD SLB Laulara halo ameasa ida liu husi jogadór Mouzinho de Lima maibé sei falla.

AD SLB Laulara aumenta tan golu ida iha minutu 81 liu husi Serafin Brito hafoin aproveita bola kantu ne’ebé suta husi Italo Soares Pimentel. No AD SLB Laulara kompleta nia vitóri ho golu ikus husi Serafin Brito iha minutu 90 hodi muda score ba 4-1.

Ho vitória  ne’e, ekipa AD SLB Laulara (Makikit Laulara) provizoriamente lidera tabela klasifikasaun Liga Timorense époka 2026 ho pontu 13 husi jogu lima, enkuantu Karketu Díli F.C tur iha segunda klasifikasaun ho pontu 10.

 Jornalista: Marito da Costa/Editór: Vito Salvadór