Liga Timorense, F.C Porto Taibesse no AS Marca Fahe Pontu Hanesan iha Jornada da-Neen

F.C Porto Taibesse vs As Marca iha Liga Timorense Époka 2026. Imajen/LFTL

Díli, 10 Jullu 2026 (RAFA.TL)- Ekipa F.C Porto Taibesse no As Marca tenke fahe pontu hanesan hafoin ekipa rua empata ho score 1-1 iha jogu kontinuasaun jornada da-neen, Liga Timorense époka 2026, iha Estádiu Munisipál Díli, Kinta-ne’e.

Durante jogu, ekipa rua mai ho ambisaun hanesan hakarak rekolla vitória hodi asegura pozisaun iha tabela klasifikasaun provizoriu.

Ekipa F.C Porto Taibesse lansa uluk atake ba adversáriu As Marca, maibé sei falla.

F.C Portu Taibesse halo ameasa ba baliza AS Marca liuhusi kabesada jogadór Joãozinho Amaral iha área penalidade adversáriu nian, maibé bola ne’e sei kona poste.

Ekipa rua kontinua hatudu jogu nakloke no atrativu, no halo kontra-atake ba malu. Ritmu jogu sai lalais no emosionante, tanba ekipa rua buka dalan atu lidera score. Ikus mai, iha minutu 22, F.C Portu Taibesse konsege lidera ho score 1-0 liuhusi golu ne’ebé marka husi jogadór Jardiel Piadade.

Ekipa As Marca kontinua mantein disiplina no halo jogu ho kalma hodi buka atu responde golu ne´e no esforsu ne´ebé iha ikus mai lori rezultadu iha minutu 29 liu husi golu Gelvanio Alberto hodi muda score ba 1-1.

Ekipa rua mantein halo kontra atake ba malu, maibé la muda score iha tabela, nune’e ekipa rua tenke ba intervallu ho pontu hanesan.

Tama ba segunda parte, treinadór husi ekipa rua halo mudansa balu liuhusi substituisaun jogadór atu hasa’e performa ekipa ho enerjia foun ba sira maibé seidauk lori rezultadu.

Tama ba minutu 48, ekipa AS Marca hetan oportunidade osan mean ida atu marka golu liuhusi Jogadór Gabriel Pires ho bola mesak iha área penalidade hodi lansa suta direita ho maka’ás ba baliza, maibé bola sei halai ses husi baliza no la konsege golu.

Ekipa F.C Porto Taibesse hetan mos oportunidade liuhusi jogadór Jardiel Piadade ne’ebé simu bola di’ak husi Daniel Appiah iha área penalidade hodi halo sutu direita, maibé guarda-redes AS Marca hatudu nia kualidade defensivu  no konsege  salva bola.

Ekipa rua kontinua lansa kontra atake ba malu no hatudu jogu ida agresivu, maibé to’o jogu termina, ekipa rua mantein ho score 1-1.

Ho rezultadu ne’e, As Marca mantein iha zona mean tabela klasifikasaun ho pontu tolu  husi jogu neen, no F.C Porto Taibesse mantein iha pozisaun da-neen ho pontu neen husi jogu neen.

Jornalista: Marito da Costa/Editór: Vito Salvadór