Liga Futsal Timor-Leste Segunda Divizaun, M-VDL Halakon Fiel F.C 5-2

Ekipa Marabia Vale de Lahane (M-VDL).

Díli, 06 Outubru 2026 (RAFA)- Ekipa Marabia Vale de Lahane (M-VDL) susesu rekolla pontu tolu hafoin halakon nia adversáriu Fiel F.C ho score 5-2 iha jogu kontinuasaun Liga Futsal Timor-Leste segunda divizaun époka 2026.

Jogu ne’ebé hala’o iha Kampu Futsal F-FDTL, Díli, Tersa-ne’e, ekipa M-VDL hahú jogu ho dominasaun desde.

Presaun no atake ne’ebé kontinua fó rezultadu iha minutu rua, bainhira Carlos Soares konsege marka golu dahuluk, hodi lori M-VDL lidera 1-0.

Golu lais ne’e halo ekipa rua aumenta intensidade jogu no kontinua buka oportunidade liu husi atake. Tama ba minutu 11, M-VDL aumenta vantajen ba 2-0, liu husi asaun Jerimias Cardoso.

Fiel F.C ne’ebé sofre golu rua la deziste. Minutu ida deit depois, Delzio de Jesus konsege responde ho golu ida hodi hamihis diferensa ba 2-1.

M-VDL kontinua kontrola ritmu jogu no domina bola. Tama ba minutu 17, José de Jesus aumenta vantajen tan ho golu ida, hodi lori M-VDL remata primeiru parte ho rezultadu 3-1.

Iha segunda parte, Fiel F.C hahú ho motivasaun aas, ho nune’e, jogu foin hala’o minutu rua, Delzio de Jesus marka golu segundu ba nia ekipa, hodi hamihis rezultadu ba 3-2.

Ekipa rua lansa kontra atake ba malu, buka oportunidade atu aumenta golu. Nune’e,  tama ba minutu 27, Isaac Lelan konsege marka golu ba M-VDL, hodi haboot vantagen ba 4-2.

M-VDL kontinua kontrola jogu to’o minutu 34, bainhira Leonel Messi konsege marka golu ida tan, hodi kompleta vitória M-VDL ho rezultadu final 5-2 kontra Fiel F.C.

Jornalista : Davilio Valdamir/Mario Fili