LFTL Sei Ajusta Liga Timorense Tuir Kalendáriu FIFA

Liga Timorense époka tinan kotuk. Imajen/dok.LFTL

Díli, 02 Outubru 2026 (RAFA)- Orgaun Liga Futeból Timor-Leste (LFTL) planeia atu ajusta kalendáriu Liga Timorense tuir kalendáriu FIFA atu bele armoniza kompetisaun doméstika ho kalendáriu internasionál no fasilita preparasaun selesaun nasionál.

Prezidente Orgaun Liga Futeból Timor-Leste (LFTL), Hipolito Soares ba jornalista sira iha Estádiu Munisipál Díli, Kinta-ne’e, esplika ba époka ida-ne’e, Liga hamutuk ho Governu no Federasaun Futeból Timor-Leste (FFTL) konsidera atu ajusta kalendáriu kompetisaun, tanba iha tinan sira liubá Liga Timorense hahú iha tempu ne’ebé diferente ho kalendariu FIFA no situasaun ne’e mós afeta ba kalendáriu no oráriu selesaun nasionál.

“Agora ita atu ajusta kalendariu tuir kalendariu FIFA nian baibain komesa iha fulan-Agostu agora ita planu tarde liu primeira volta ne’e komesa iha fulan-Outubru nia rohan no termina iha fulan-Dezembru, ita komesa fali segunda volta iha tinan oin, fulan-Janeiru to’o remata,” Prezidente LFTL, Hipolito Soares hateten.

Prezidente Ezekutivu Orgaun Liga ne´e informa, janela transferénsia jogadór ba époka 2026/2027 hahú loke iha loron 01-15 fulan-Outubru no durante períodu ida-ne’e, klubu sira iha oportunidade atu halo rejistu no transferénsia jogadór sira antes kompetisaun Primeira Divizaun hahú.

Orgaun Liga mós halo mudansa ba iha kuota jogadór estranjeiru no kada klubu bele rejista jogaór estranjeiru na´in-ualu, maibé iha kampu laran, klubu bele hatama jogadór estranjeiru to’o na´in-neen de’it.

Iha planu Primeira Volta Primeira Divizaun de’it, Liga iha ona proposta orsamentu US$300 mil ne’ebé sei aprezenta ba Ministériu Juventude, Desportu, Arte no Kultura (MJDAK).

Orsamentu ne’e sei destina ba subsidiu ba klubu no premiu ba kada jogu ho montante US$4,000. Distribuisaun premiu sei fahe tuir rezultadu: ekipa ne’ebé manan sei simu 70%, ekipa ne’ebé derrota simu 30%, no se jogu termina ho empate, ekipa rua sei simu 50% ba kada ekipa.

Klubu primeira divizaun Liga Timorense hamutuk 10 hanesan, AD SLB Laulara, Santa Cruz F.C, Karketu Dili F.C, Emanuel F.C, Assalam F.C, Coração F.C, F.C Porto Taibesse, DIT F.C, AD Santo Antonio no Hibers Díli F.C

Jornalista: Davilio Valdamir