Kylian Mbappé Marka Brace no Lori Les Bleus Hakat Ba Jornada 16 Kopa Mundiál 2026

Jogadór estrella Fransa Kylian Mbappé

Díli, 01 Jullu 2026 (RAFA.TL)- Jogadór estrella Fransa Kylian Mbappé marka golu-rua (brace) no lori Fransa (ekipa Les Bleus) hakat ba Jornada 16 Kopa Mundiál 2026 hafoin halakon adversáriu Suésia iha faze eliminatória ho score 3-0.

Jogu entre Fransa no Suésia hala’o iha Estádiu MetLife, Kuarta, (01/07/2026), Suésia halo inísiu ida ne’ebé promisór, kontrola pose iha minutu dahuluk sira; jogu ligasaun entre Viktor Gyökeres no Alexander Isak kulmina iha suta ida ne’ebé lansa hosi Mike Maignan.

Fransa hetan sira nia ritmu no hahú domina jogu no Kylian Mbappé no Lucas Digne hahú lansa sutu direita sira ba adversáriu maske bola ne´ebé lansa la konsege halo golu ba guarda-rede Jacob Widell Zetterström.

Suésia kria oportunidade perigozu ida hafoin deskansa hidratasaun nian. Husi situasaun suta livre, bola liuhosi Alexander Isak iha área penalidade, maibé nia suta fraku liu no fasil salva hosi Maignan.

Fransa ikus mai marka golu ida liu husi  Mbappé hodi muda score ba 1-0, hafoin aproveita bola kantu ida hosi liña karuk, jogu kombinasaun entre Olise no Dembele kulmina iha pasajen baixu ida no Mbappe remata ho suta ida ba poste dook no halo golu.

Tama ba segunda parte, Suésia lansa kedas atake ida no besik atu marka gollu maibé sei falla. No Fransa mos aproveita hasae kedas ritmu jogu no tama ba iha minutu 53, Bradley Barcola aumenta tan golu ida ba Fransa hodi muda score ba 2-0.

Fransa kontinua domina jogu no tuir mai Olise lansa tan ameasa ba adversáriu husi parte loos área penalidade nian, nia lansa suta ida ho ain-karuk ne’ebé maka Zetterstrom hapara.

Fransa ikus mai marka golu datoluk ne’ebé sira buka iha minutu 74 no Mbappé marka tan nia naran iha tabela score no markadór, hodi muda score ba 3-0.

Iha minutu rua ikus hosi tempu regular nian, Suésia hetan oportunidade atu marka fali golu ida, maibé suta ida hosi distánsia besik hosi Gyökeres hetan salva hosi Maignan. Fransa hatán ho tentativa ida hosi Jean-Philippe Mateta; Désiré Doué halo kruzamentu ba poste dook, maibé Mateta nia volei liu barra.

Ho vitória ida-ne’e, Fransa sei hasoru Paraguai tuirmai hodi kompete ba fatin ida iha oitavu-finál Tasa Mundiál 2026 nian.

Jornalista: David Gonçalves/Editór: Vito Salvadór