KSTL Enkoraja Traballadór Sira Defende Sira-Nia Direitu iha Servisu Fatin

KSTL enkoraja traballadór sira brani defende sira-nia direitu iha servisu fatin no kontra violénsia ho forma saida de’it ne’ebé afeta ba dignidade umana traballadór nian. Imajen/Rafa.tl

DILI, RAFA.tl– Konfederasaun Sindikatu Timor-Leste (KSTL) enkoraja traballadór sira brani defende sira-nia direitu iha servisu fatin no kontra violénsia ho forma saida de’it ne’ebé afeta ba dignidade umana traballadór nian.

KSTL hato’o deklarasaun ne’e iha ámbitu komemorasaun loron Direitus Umanus ba dala-18 ne’ebé Timor-Leste mós selebra, Kuarta (10/12/2025).

Iha komemorasaun loron Direitus Umanus ne’e, KSTL organiza kampaña no fahe brosura ba públiku no taka panflitu ba transporte públiku ho objetivu atu halo sensibilizasaun edukasaun kona-bá oinsá halakon asédiu no violénsia iha fatin públiku no instituisaun sira.

KSTL nia atividade ida-ne’e realiza atu fortifika ratifikasaun konvensaun Organizasaun Internasionál ba Traballu (ILO, sigla Inglés)  númeru 190 kona-bá halakon violénsia no asédiu iha mundu.

Kordenadora atividade ne’e, Etelvina Sarmento hatete, komemorasaun loron Direitus Umanus ne’e, KSTL aproveita mós oportunidade ida-ne’e hodi halo distribuisaun ba brosura no taka panfletu ba transporte públiku sira kona-bá konvensaun ILO nian ne’ebé ko’alia kona-bá violénsia no asédiu iha fatin servisu.

“Ami fahe informasaun ba komunidade no maluk traballadór sira, atu nune’e, sira iha informasaun no ida ne’e bele ba to’o iha sira nia fatin hodi sira hatene no labele nonók de’it bainhira hasoru violénsia no asédiu ruma iha fatin servisu,” Elvina Sarmento informa ba Rafa.tl.

Nia hatutan, iha selebrasaun loron Direitus Umanus ne’e pontu importante liu maka sensibiliza informasaun kona-bá konvensaun 190, oinsá mos governu atu bele ratifika tanba konvensaun ne’e la’os de’it ba ema traballadór sira, maibé ba estudante sira no ema hotu-hotu ne’ebé servisu iha instituisaun no vale ba ema se de’it maka hasoru violénsia no asédiu.

Nia subliña, sensibilizasaun ne’e sira realiza durante loron-tolu iha fatin públiku, liu-liu iha área ne’ebé  instala semaforu ho objeitvu oinsá ema ne’ebé asesu estrada públiku hodi  bele iha koñesimentu kona-bá konvensaun 190 ne’e rasik.

“Atividade ida ne’e ami halo durante loron-tolu ona, iha loron Sesta liubá, ami halo iha Palásiu Governu oin, horseik, ami halo iha Timor-Plaza oin, no ohin ami halo iha Aitarak-Laran,” Nia informa.

Tuir nia, durante loron tolu sira realiza atividade ida-ne’e, kuaze ema rihun ida resin maka asesu ba informasaun refere, hodi nune’e, ajuda komunidade sira ne’ebé durante ne’e hetan asédiu no violénsia labele ta’uk atu ko’alia sai, tanba maioria iha instituisaun ema barak sei kontra traballadór sira nia direitu, maibé sira nunka atu ko’alia sai.

KSTL nia pozisaun kontinua hamrík hodi defende traballadór sira nia direitu, oinsá ema ida bele livre husi asédiu iha servisu fatin, iha eskola no iha fatin públiku sira.

Liu husi komemorasaun loron mundiál direitus umanus ne’e, KSTL mós hato’o mensajen ba traballadór sira, tenke brani atu defende idak-idak nia direitu, no tane ita nia dignidade. Bainhira sai vítima iha instituisaun ruma, tenke brani hatete sai.

KSTL mós husu ba governu atu ratifika lalais konvensaun 190 ne’e hodi proteje traballadór no ema hotu-hotu nia direitu atu livre husi asédiu no violénsia.

Reportajen ekipa Rafa.tl