Kopa Mundiál Grupu D, Austrália Manan Turkia ho Score 2-0

Jogadór Austrália selebra vitória hafoin halakon nia adversáriu Turkia ho score 2-0. Imajen/Reuters

Díli, 14 Juñu 2026 (RAFA.TL)- Austrália manán nia adversáriu Turkia ho score 2-0, iha jogu apuramntu Grupu D Kopa Mundiál 2026, ho golu ne’ebé marka husi jogadór Nestory Irankunda ho Connor Metcalfe.

Vitória Austrália nian ne’e hanesan presaun boot ba Turkia nia regresu ba kompetisaun Internationál ne’e hafoin auzénsia durante tinan 24.

Liuhosi jogu ne’ebé hala’o iha Estádiu Vancouver, Kanadá, Domingu (14/06/2026), jogadór Austrália Nestory Irankunda marka nia golu ba sira-nia adversáriu  Turkia iha minutu 27 hodi muda score ba 1-0.

Austrália Nestory, avansadu ho tinan 20, ne’ebé joga ba klube inglés Watford, sai hanesan markadór australianu ne’ebé joven liu iha istória Kopa Mundiál nian.

Jodafór ne’e halo selebrasaun ba nia golu hodi baku bandeira kantu nian hodi fó omenajen ba lejenda futeból australianu Tim Cahill.

Austrália kontinua domina jogu no halo presaun ba adversáriu to’o jogu primeira parte termina.

Tama ba segunda parte, Turkia hahú halo mudansa signifikativu ba nia tátika hodi halo presaun ba Austrália, ho nune’e Austrália muda stratejia hodi joga ho defeza na’in-lima no hasai markadór Nestory Irankunda hodi aumenta médiu atu fortifika defeza hodi asegura vitória ne’ebé iha.

Tama ba minutus 75 jogadór Austrália Metcalfe marka tan golu ida hafoin aproveita kontra atake ne’ebé iha hodi muda score ba 2-0.

Jogadór Nestory Irankunda to’o iha Austrália nu’udár refujiadu ida hosi Tanzánia. Ninia kolega ekipa Mohamed Touré, ho tinan 22, tuir dalan hanesan, tanba halo migrasaun hosi Guiné. Sira na’in-rua liu hosi akademia Adelaide United nian molok ba Inglaterra, iha ne’ebé sira joga iha divizaun daruak.

Guarda-rede Austrália Patrick Beach hanesan jogadór prinsipál ida iha jogu ne’e, halo salvasaun ualu iha jogu tomak, inklui intervensaun desizivu ida iha suta dook hosi Abdulkerim Bardakcı iha primeira parte no ida seluk iha suta livre perigozu hosi médiu Real Madrid Arda Güler iha minutu 57.

Pozisaun inisiál Beach nian sai hanesan surpreza ida, ho treinadór Tony Popovic ne’ebé husik hela Matthew Ryan ne’ebé iha esperiénsia.

Kenan Yildiz, ho tinan 21, jogadór Juventus nian, tama iha intervalu ba ekipa turku, maibé labele muda jogu nia lala’ok.

Arda Güler, talentu joven seluk ho tinan 21, esforsu ba Turkia hodi kompete iha Tasa Mundiál no iha tinan 2002, bainhira ekipa ne’e to’o iha meia-finál sira hosi torneiu ne’ebé hala’o iha Koreia-Súl no Japaun.

Ba Austrália, ida-ne’e maka sira-nia partisipasaun ba dala-neen tuituir malu no ba dala-hitu iha Tasa Mundiál ida.

Ekipa nasionál Austrália to’o iha torneiu ne’e ho morál aas, hodi hanoin hikas sira nia kampaña 2022 nian iha Qatar, iha ne’ebé sira ultrapasa faze grupu nian antes eliminadu hosi Arjentina, kampeaun eventuál.

Iha grupu D, Austrália ho Estadus Unidus ne’ebé manán Paraguai ho 4-1 iha Sesta  liubá ne’e iha Los Angeles lidera ho pontu tolu ida-idak. Turkia no Paraguai seidauk marka golu.

Kontinua asiste jogu kopa mundiál iha transmisaun direta iha Timor-Leste ho NTV/ETO-Telco

Jornalista: Davilio Valdamir/Editór: Vito Salvadór