Kopa Mundiál 2026, Suésia Halakon Tunízia ho Score 5-1

Ekipa Suésia selebra vitória hafoin halakon nia adversáriu Tunízia ho score 5-1.

Díli 15 Juñu 2026 (RAFA.TL)- Suésia susesu rekolla pontu tolu importante iha nia jogu dahuluk iha Kopa Mundiál Grupu F hafoin halakon nia adversáriu Tunízia ho score 5-1.

Iha jogu ne’ebé hala’o iha Estádiu BBVA Guadalupe, Segunda (15/06/2026), ekipa nasionál Suésia marka golu rua iha primeira parte liu husi Yasin Ayari, no Alexander Isak.

Tunízia responde golu ida molok ba intervallu. Suésia aumenta tan golu tolu iha segunda parte liu husi Viktor Gyokeres, Mattias Svanberg, no Ayari.

Ho vitória ne’e, Suésia lidera Grupu F ho pontu tolu, ho Tunízia iha klasifikasaun ikus liu, Olanda no Japaun iha Suésia nia okos hafoin empata 2-2.

Iha jogu amante futeból sira bele asiste oinsá Suésia halo jogu ida ho agresivu, jogadór Viktor Gyokeres halo korta ida hosi parte karuk ba kaixa penalidade nian no lansa tiru ida, maibé bola ne’e sai hosi alvu.

Suésia muda kedas score ba 1-0 iha minutu hitu, liu husi Yasin Ayari hafoin aproveita bola  livre iha área penalidade nian.

Tunízia tenta suta ida hosi liur área penalidade nian iha minutu 17 no jogadór Elias Saad halo suta ida, maibé bola ne’e liu deit husi baliza sorin.

Suésia aumenta sira nia golu iha minutu 30 liu husi jogadór Alexander Isak hodi muda score ba 2-0. Hafoin golu ne´e, ekipa nasionál Tunízia responde kedas ho golu ida liu husi jogadór Karim Rekik molok ba entervallu.

Tama ba segunda parte ekipa rua lansa tan kontra atake ba malu no Suésia kontinua domina jogu ho tátika ne’ebé iha hodi fó presaun ba Tunízia.

Maske joga iha presaun Tunízia mantein halo jogu ida ho esforsu másimu atu bele responde atake ne’ebé adversáriu Suésa iha hodi buka atu hatama golu, esforsu Tunízia nian ne’e hetan presaun maka’ás husi Suésia iha minutu 59 bainhira jogadór Viktor Gyokeres marka tan golu ida hodi muda score ba 3-1.

Hafoin golu ne’e ekipa Suésia halo jogu ida mais pasivu hodi asegura vitória ne’ebé iha, maibé ekipa Tunízia mós pasivu liu iha pasajen sira hodi nafatin fo vantajen ba Suésia atu kontinua domina bola.

Ekipa selesaun nasionál Suésia aumenta sira nia golu ba 4-1 iha minuitu 84 liu husi jogadór Mattias Svanberg. Golu ne’e inisialmente la permite hosi liña-liña tanba offside, maibé VAR foti desizaun ne’ebé loos no permite golu.

Suésia aumenta tan golu ida iha tempu extra segunda parte nian liu husi jogadór Ayari hodi muda score ba 5-1. Golu ne’e mak termina ekipa rua nia jogu no vitória ba ekipa Suésia.

Kontinua asiste transmisaun direta kopa mundiál 2026 liuhusi kanál ofisiál iha Timor-Leste, NTV/ETO-Telco ho live streaming Timor Telecom  (tv.timortelecom.tl).

Jornalista: Davilio Valdemir/Editór: Vito Salvadór