Kopa Mundiál 2026, Noruega Manan Irake ho Score 4-1

Noruega asegura vitória dahuluk iha jogu grupu I Kopa Mundiál 2026 hafoin halakon nia adversáriu Irake ho score 4-1.

Díli, 17 Juñu 2026 (RAFA.TL)- Noruega asegura vitória dahuluk iha jogu grupu I Kopa Mundiál 2026 hafoin halakon nia adversáriu  Irake ho score 4-1.

Jogu ne’ebé hala’o iha  Estádiu Boston, Massachusetts, Kuarta (17/06/2026), Noruega susesu rekolla vitória ne´e hafoin nia jogadór estrella Erling Haaland marka golu rua iha primeira parte no reposde ho golu ida husi Irake liu husi jogadór Aymen Hussein.

Iha jogu  ne’e ekipa rua tun ho ambisaun hanesan, hakarak asegura pontu tolu no Irake halo kedas presaun ba Noruega iha minutu dahuluk sira jogu nian.

Noruega koko atu  aproveita oportunidade ida hosi set piece, maibé la hetan rezultadu. Noruega lidera iha minutu 29, liu husi jogadór  Erling Haaland hodi muda score ba 1-0.

Golu ne’e mosu husi atake noruegués husi parte kotuk. Antonio Nusa pasa ba David Moller-Wolfe, ne’ebé iha parte karuk, Moller-Wolfe hafoin ne’e halo kruzamentu ida liuhosi baliza, ne’ebé maka Haaland remata.

Irake halo empata iha minutu 39 liu husi Amir Al-Ammari husi liman-karuk halo pasajen ida ba Aymen Hussein no konsege aproveita hodi halo remata no marka golu hodi muda score ba 1-1.

Noruega kontinua halo jogu di´ak iha liña klaran no Haaland marka hikas golu ida iha minutu 43 hafoin aproveita

Tama ba segunda parte, Noruega kontinua domina jogu no lansa atake ba adversáriu hodi fó presaun maka’ás, maske nune’e Irak iha oportunidade iha minutu dahuluk segunda parte nian jogadór Brahim Bavesh haruka kruzamentu ida hosi sorin-loos no Hussein hasoru ho kabesa, maibé bola sai dook hosi baliza.

Noruega aumenta sira nia golu iha minutu 76 liu husi jogadór Leo Ostigard no muda score ba 3-1. Hafoin golu ne´e ekipa nasionál Irake kontinua hadia sira nia liña hodi kontinua buka oportunidade atu lansa mos atake ba Noruega maibé sei falla.

Tama ba tempu estra segunda parte nian, Noruega marka golu dahaat iha jogu ne’e iha minutu 90+7, hafoin Haaland dudu bola ho ulun ba kaixa Irake nian, iha ne’ebé hasoru hosi Kristian Thorstvedt no Bola ne’e kona Aymen Hussein no sai hanesan autogolu, no ida ne´e muda kedas score ba 4-1.

Ho rezultadu ne’e, Noruega lidera Grupu I ho pontu tolu, diferensa golu ho Fransa ne’ebé mós iha pontu ne’ebé hanesan.

Asiste transmisaun direta husi NTV/Eto Telco ho live streaming iha tv.timortelecom.tl.

Jornalista: David da Costa/Editór: Vito Salvadór