Kopa Mundiál 2026, Kolómbia Rekolla Pontu Tolu Hafoin Manan Uzbekistán 3-2

Uzbekistán vs Colombia iha Kopa Mundiál 2026 iha Estádiu Azteca, México, 17 Juñu 2026. Imajen/Reuters

Díli, 18 Juñu 2026 (RAFA.TL)- Ekipa selesaun nasionál Kolómbia rekolla pontu tolu importante iha sira-nia jornada dahuluk iha jogu Kopa Mundiál 2026 hafoin halakon  nia adversásiu Uzbekistán ho score 3-2.

Jogu grupu K entre Uzbekistán kontra Kolómbia ne’ebé  hala’o iha Estádiu Azteca, México, Kuarta (18/6/2026), Uzbekistán hahú halo kedas auto defeza no defikulta  Kolómbia iha kampu laran.

Ekipa Uzbekistán no Kolombia ida-idak defende nia rede husi ameasa sira. Kolómbia lansa kedas ameasa ida ba nia adversáriu iha minutu 18 liu husi Jhon Arias.

Kolómbia kontinua hetan oportunidade liu hosi jogadór Luis Diaz, maibé oportunidade ne´e seidauk aproveita ho di’ak hosi bola kantu ne’ebé suta husi James Rodríguez.

Kolómbia hetan tan oportunidade atu marka golu iha minutu 32. Bola pasejen husi Arias ba Luis Díaz, ne’ebé tenta husi liña karuk iha área penalidade. Bola kona poste (besi riin) Uzbekistán nian antes hafoin antisipa husi Uktir Yusupov.

Ikus mai Kolómbia marka golu ida iha minutu 41, liu husi nia jogadór Daniel Munoz hodi muda score ba 1-0.

Hafoin golu ne’e Kolómbia kontinua halo atake, maibé defeza husi Uzbekistán defende ho disiplina hodi trava atake ne´ebe tenta husi adversáriu.

Tama ba segunda parte, Uzbekistán joga ho agresivu liu husi presaun maka’ás ho nune’e tama ba Iha minutu 60, Uzbekistán konsege responde golu ida hodi halo empate ba score sai 1-1 liu husi kabesada Abbosbek Fayzullaev.

Score refere la dura to’o tempu naruk, tanba liu de’it minutu lima, Kolómbia lidera fila fali liu husi asaun Luis Díaz hodi muda score ba 2-1.

Tama ba minutu 10 ikus, Kolómbia kuaze domina total jogu no Uzbekistán halo deit auto defeza hodi hein bola oportunidade mak halo kontra atake.

Kolómbia konfirma nia vitóri ho golu ikus husi Jaminton Campaz, hodi muda aumenta score sai 3-1.

Ho golu ne’e, halo ekipa Kolómbia lidera grupu K ho pontu tolu. Ekipa selesaun Portugál no RD Congo mantein iha segunda no terseira klasifikasaun, enkuantu Uzabekistán mantein iha tabela ikus ho pontu zero.

Jornalista: Davilio Valdemir/Editór: Vito Salvadór