Kopa Mundiál 2026, Iraun ho Nova Zelándia Empata 2-2

Jogu Iraun ho Nova Zelándia fahe pontu hanesna ho score 2-2.

Díli, 16 Juñu 2026 (RAFA.TL)- Golu haat akontese iha jogu kontinuasaun Kopa Mundiál faze grupu G entre Iraun no Nova Zelándia hafoin ekipa rua empata ho score 2-2.

Jogu entre Iraun no Nova Zelándia ne’ebé halao iha Estádiu Los Angeles, Inglewood, Tersa (16/06/2026), Nova Zelándia marka uluk golu ida iha minutu hitu liu husi nia jogadór  Elijah Just hafoin aproveita pasajen husi nia kompatriota Elijah Just hodi lansa sutu ida ba guarda-rede Iraun nian hosi distánsia besik no muda kedas score ba 1-0.

Kapitaun Iraun Mehdi Taremi, kuaze halo empata iha minutu balun liutiha, maibé nia suta hosi área penalidade nia liur kona baliza Nova Zelándia nian.

Iraun joga ho agresivu liután. Tentativa Iraun nian hodi halo empata ikus mai mosu iha minutu 32 liu husi jogadór Ramin Rezaeian ho susesu aproveita bola ne’ebé namkari iha baliza Nova Zelándia nia oin hodi marka golu no muda score ba 1-1

Ekipa rua kontinua joga ho agresivu, hodi buka atu aumenta tan golu ida. Iha minutu 43, Nova Zelándia hetan oportunidade husi suta livre. Maski nune’e, Chris Wood nia suta ne’e dirije nafatin ba guarda-redes Iraun nian, Alireza Beiranvand.

Liu tiha minutu balun, C. McCowat ameasa baliza Iraun nian, maibé nia suta hosi liur área penalidade fraku liu.

Iraun ameasa fali iha minutu 45+4 ho lansamentu naruk ida. Maski nune’e, kabesa husi jogadór Iraun ne’e kona de’it iha rede Nova Zelándia nia tutun. Iraun iha oportunidade atu hatama golu hasoru Nova Zelándia iha minutu 45+4 bainhira Ali Nemati hatama ho kabesa iha suta livre, maibé, árbitru la permite golu tanba Ali Nemati konsidera offside.

Tama ba segunda parte, Nova Zelándia hetan vantajen iha minutu 54 liuhosi Elijah Just, ho kombinasaun atake sira ne’ebé di’ak, Just ho susesu marka golu  hodi muda score ba 2-1.

Maski nune’e, la presiza tempu naruk atu Iraun halo empata no tama ba minutu 64 liuhosi jogadór M. Mohebi nia kabesa, ne’ebé maka aproveita kruzamentu husi Ramin Rezaian nia hodi muda score ba 2-2.

Ekipa rua kontinua koko atu aumenta tan golu iha tempu restu. Maibé, skor mantein 2-2 to’o jogu remata. Ekipa rua rekolla deit pontu ida husi sira rua nia partida hodi prepara ba jogu sira tuir mai iha faze apuramentu.

Jornalista: Marito da Costa/Editór: Vito Salvadór