Kopa AFTL, Mauputar F.C Halakon Caesar Dante F.C ho Score 7-3

Mauputar F.C susesu hakat ba Meias Finais Kopa AFTL hafoin halakon Caesar Dante F.C iha Quartu Finais ho score fantastiku 7-3.

Díli, 10 Juñu 2026 (RAFA.TL)- Mauputar F.C susesu hakat ba Meias Finais Kopa Asosiasaun Futsal Timor Leste (AFTL) hafoin halakon nia adversáriu Caesar Dante F.C iha Quartu Finais ho score fantastiku 7-3.

Jogu kontinuasaun ne´ebé halao iha kampu futsal FALINTIL-Forsa Defeza  Timor Leste (F-FDTL), iha  Fatuhada, Díli, Tersa (09/06/2026), ekipa rua  hatudu jogu furak iha kampu hodi atrai adeptus hadomi futsal sira ne’ebé asiste direta iha jogu refere.

Maske Mauputar F.C, haforsa hosi jogadór estranjeiru na’in-haat hanesan Juan Alexa (7), Joice Liunokas (10), Juned Putra (17) ho Subhan Faidasa (14), no Caesar Dante F.C  tun ho jogadór lokal, maibé konsege lansa kontra atake maka’ás.

Hakat ba iha minutu tolu, Caesar Dante F.C hetan oportundade atu marka golu liu hosi penalidade hafoin kapitaun ekipa Maupuar F.C, Cesario Bareto komete erru iha grande área.

Jogadór Nildo Tores ne’ebé hetan fiar hosi ekipa sai ezekutadór ba penalidade refere la konsege aproveita hodi kontribui golu tanba sei bele antisipa ho dia’k hosi guarda rede Mauputar F.C nune’e score 0-0 mantein la muda.

Mauputar F.C kontinua  halo rotasaun ba jogadór sira liu hosi substituisaun jogadór, ho nune’e tama ba iha minutu hitu,  Denilson susesu produs golu ida hodi lori nia ekipa Maupuar F.C lidera ho score 1-0.

Ho score refere jogu sai manas liután ba ekipa rua, ne’e halo  kontra atake ba malu ne’ebé lais no tama ba iha minutu  13 Mauputar F.C marka tan golu ida liu hosi jogadór estranjeiru Juned Putra hodi muda aumenta score ba 2-0.

Ho score refere intensiddade jogu komesa agresivu liután . Maibé to’o termina jogu priemeira parte score 2-0 mantein la muda.

Kontinua ba segunda parte ritmu jogu kontinua la muda ho intensiddade jogu ne’ebé agresivu nune’e jogu foin hala’o minutu ida jogadór estranjeiru Juan Alexa kontrbui golu ida hodi haboot liután score sai 3-0.

Ho golu ne’e Mauputar F.C kontinua domina  jogu, ho nune’e, tama ba iha minutu 24, Juned Putra marka tan nia naran hodi haboot liután score ba 4-0.

Ho score refere jogu sai manas liu tan ba ekipa rua ne’e hodi lansa kontra atake ba malu no tama ba iha minutu 28, Juned Putra marka tan nia naran ba datoluk nian hodi haboot liu tan score ba 5-0.

Sofre ona golu lima la hamate espiritu kompetetivu Caesar Dante F.C hodi lansa kontra atake ba ekipa Maupuar F.C no tama ba iha minutu 31 Caesar Dante F.C konsege responde golu ida hodi hamihis score ba 5-1 liu hosi jogadór Leonito Tores.

Ho score refere jogu kontinua manas tanba ekipa Caesar Dante F.C hala’o jogu ho power play no tama ba iha minutu 37 Caesar Dante F.C produs tan golu ida hodi hamihis score sai 5-2.

Ho score refere tensi jogu sai manas liu tan ba ekipa rua tanba ekipa Caesar Dante F.C kontinua jogu power play hodi buka aumenta golu ho nune’e tama ba iha minutu 38 ekipa Caesar Dante F.C konsege produs tan golu ida hodi hamihis liután score sai 5-3.

Ho score refere tensi jogu komesa manas liután ba ekipa rua ne’e hodi lansa kontra atake ba malu, maibé ekipa Caesar Dante F.C ne’ebé mantein jogu power play konsege aproveita hosi Mauputar F.C hodi lansa tan golu rua tui-tuir malu liu hosi Kapitaun ekipa Cesario Bareto iha minutu 39 hodi haboot liu tan ba 7-3 to’o termina jogu Segunda parte.

Hosi rezulatadu vitória ne’e lori ekipa Maupuar F.C hakat ba faze eliminasaun meias finais Kopa AFTL 2026, enkuantu ekipa Caesar Dante F.C obrigadu tenke elimina tanba jogu ne’e ho sistema bota fora ka lakon sai.

Jornalista: Davilio Valdamir/Editór: Vito Salvadór