Konstrusaun Kampu Multifunsaun Kampung Alor Atraza

Obra Kampu Multifunsaun Kampung Alor la'o atraza.

Díli, 04 Setembru 2026 (RAFA) – Ministru Juventude, Desportu, Arte no Kultura (MJDAC), Nelio Isaac Sarmento, konsidera  progresu konstrusaun Kampu Multifunsaun iha Kampung Alor atraza kompara ho konstrusaun Kampu Multifunsaun iha Kampu Bintang, Bidau-Toko Baru, ne’ebé agora daudaun hein deit materiál balu atu kompleta etapa final ba konstrusaun.

“Kampung Alor nia andamentu neneik oituan. Ha’u seidauk hetan tanbasá mak atrazu, ne’e so kompañia mak bele fó resposta. Kampu Bintang, ita haré, bele dehan nia mak sei hotu uluk kompara ho Kampung Alor, tanba agora hein deit du’ut sintétiku mai hodi nahe,” Ministru Nelio Isaac Sarmento hateten ba jornalista sira, iha nia knar-fatin, Kinta-ne’e.

Nia hatutan, konstrusaun kampu rua ne’e la’ós responsabilidade Ministériu deit, Ministériu nu’udar na’in ba obra, maibé iha prosesu konstrusaun tenke iha supervizaun no prezensa husi Obras Públikas no Ajensia Dezenvolvimentu Nasionál (ADN).

Ministru Nelio Isaac Sarmento hateten, prosesu aprovasaun ba espesifikasaun materiál no importasaun materiál balu bele mós kontribui ba tempu konstrusaun. Tanba, kompañia tenke liu husi prosesu aprovasaun antes materiál sira bele uza iha obra.

“Dala ruma kompañia hakarak hatama sasan ruma, nia espesifikasaun tenke hetan aprovasaun husi ministériu relevante, ne’ebé dala ruma bele kleur. Depois, sasan sira atu uza ne’e barak mai husi li’ur. Entaun, sira tenke buka no halo prosesu lubuk ida,” Ministru Nelio Isaac Sarmento haktuir.

Kampu Taibesi Besik Remata

Ministru Nelio Isaac Sarmento informa mós kona-bá konstrusaun Kampu Taibesi besik remata,  tuir kontratu tenke entrega iha fulan-Outubru 2026.

Nia hateten dadaun  ne’e bele ba haré progresu konstrusaun komapu nian hein deit finishing ona, espera katak fulan rua ka tolu mai ne’e buat hotu bele kompletu.

Kampu Comoro Faze Tenderizasaun

Iha biban ne’e, Ministru Nelio Isaac Sarmento relata mós prosesu administrativu konstrusaun kampu Comoro,  ne’ebé iha faze tenderizaaun tanba dezeñu kompletu ona, maibé agora sei iha prosesu análize husi Obras Públikas no ADN, inklui análize ba konstrusaun no item sira ne’ebé kontempla iha dezeñu.

Nia subliña se prosesu análize no aprovasaun ba dezeñu kompletu iha meadu fulan-Setembru ne’e, sei hahú kedas prosesu tenderizasaun ba konstrusaun Kampu Comoro.

Antes ne’e, Diretor kompañia Nimia Lota Unipessoal Lda, Elias do Santos klarifika katak durante prosesu konstrusaun, kompañia hasoru difikuldade iha iklima, koordenasaun no kondisaun servisu ho traballadór timor-oan. Maibe, difikuldade hirak ne’e la impede servisu  tuir planu ne’ebé estabelese ona.

“Ami enfrenta iha klima oituan no depois iha timor oan barak, ita nia badaen sira kuandu halao servisu dadaun dala ruma lia kona ida ne’e mós impede mós ba servisu,” esplika Elias do Santos.

Diretór kompañia ne’e rekoñse maski progresu obra foin atinje 25 persentu, kompañia kontinua hala’o servisu hodi aselera prosesu konstrusaun, atu bele atinje objetivu finalizasaun tuir prazu estensaun ne’ebé husu.

Konstrusaun Kampu Multifunsaun iha Kampung Alor  hahú fulan-Fevereiru tinan 2025. Tuir kontratu inisiál, projetu refere ho kustu 677, 608 USD tenke termina iha fulan-Dezembru 2025. Maibé, kompañia husu atu estensaun atu finaliza to’o fulan-Dezembru 2026.

Jornalista : Marito da Costa