Konstrusaun Estádiu Futeból Padraun Internasionál iha Tasi-Tolu Muda Ba Tibar

Ministru Juventude, Desportu, Arte no Kultura (MJDAC), Nelio Isaac Sarmento.

Díli, 05  Agostu  2026 (RAFA.TL)- Ministru Juventude, Desportu, Arte no Kultura (MJDAC),  Nelio Isaac Sarmento, informa  konstrusaun Estádiu Futeból ho padraun internasionál ne’ebé antes ne’e Governu no Federasaun Futeból Timor-Leste planeia atu harí iha  área Tasi-Tolu tenke kansela no daudaun ne’e  Governu buka hela mekanizmu seluk atu harí fali iha área Tibar, Munisipiu Liquiça.

“Mekanizmu seluk ne’e mak agora ita buka  hela komunikasaun teknika, ita nafatin komunika entre liña ministérial sira, ha’u rona katak iha parte Tibar nian ita sei hetan apoiu fundu husi país balu maibé seidauk serteza,”  Ministru Nelio Isaac Sarmento ba jornalista sira iha Palásiu Governu, Kuarta-ne´e.

Governante ne’e afirma, agora Governu  iha hela  faze diskusaun tekniká hodi hetan apoiu husi parte hotu-hotu  nune’e bele dezenvolve kampu futeból padraun internasionál  ida iha parte área Tibar nian.

“Tasi-Tolu ne’e ita dehan karik laiha ona, iha fali areá Tibar nian. Ne’e mak agora iha prosesu dikusaun hela,” Nelio Isaac Sarmento hateten.

Nia afirma parseiru internasionál ne’ebé atu fó apoiu finanseiru ba konstrusaun Estádiu Futeból  padraun internasionál ne’e sei  mai husi nasaun membru ASEAN sira.

Jornalista: Zita Menezes