Kona-bá Insidente iha Fronteira, PNTL-POLRI Halo Investigasaun Konjunta

Portavós PNTL, Superintendente Polísia João Belo dos Reis. Imajen/Rafa.tl

DILI, RAFA.tl-Polísia Nasional Timor-Leste (PNTL) halo ona koordenasaun ho Adidu Polísia Repúblika Indonézia (POLRI) iha Embaixada Indonézia nian iha Dili  atu halo investigasaun no rekonstusaun konjunta iha fatin akontesimentu hodi buka hatene loloos kauza husi insidente iha fonteira terreste Timor-Leste nian ne’ebé rezulta sidadaun Indonézia nian ida mate.

Notísia Relevante: Autoridade Timor-Leste Investiga Hela Insidente Fronteira Rezulta Sidadaun Indonézia Ida Mate

Sidadaun Indonézia  nian ne’ebé mate, naran Abel Tinus Bere, hosi Aldeia Manleten, Suku Tasifeto Leste, Rejénsia Belu, Timor Osidentál ka NTT (Nusa Tenggara Timur), ho idade tinan 33, alegadamente hetan tiru  iha fronteira  terrestre área Fatumea, Munisípiu Covalima, Domingu (17/08/2025).

Dadaun  ne’e situasaun iha fronteira terrestre ka área sira fatin akontesimentu nian, husi parte  Unidade Patrollamentu Fronteira (UPF) halo servisu maka’as kontrola situasaun hakmatek no parte autoridade PNTL ho POLRI komunika malu hodi buka daudaun solusaun ba insidente  ne’e.

Portavós PNTL, Superintendente Polísia João Belo dos Reis,  bá jornalista sira iha  Kuartél Jeral PNTL,  Sesta (22/08/2025), informa katak prosesu bá kazu sidadaun  Indonézia, mane ida mate, iha fronteira Timor-Leste ho Indonézia iha área Waitama-matan, Aldeia Belulik-kraik, Suku Belulik-leten, Fatumea, Munisípiu Covalima,  parte  Diresaun Servisu Investigasaun Kriminál (DSIK) rejista ona iha Ministériu Públiku (MP) ho Númeru Úniku Krime (NUK) 0272/2025-PNSIK.

“Agora dadaun investigasaun kontínua halo, ami mós halo koordenasaun ho parte Indonézia nian, liuhosi Adidu Seguransa ne’ebé  koloka iha Embaixada Repúblika Indonézia nian iha Dili hodi bele informa bá públiku katak prosesu investigasaun lao hela,” Superintendente Polísia João Belo dos Reis hateten.

Portavós PNTL ne’e haktuir autoridade seguransa Timor-Leste ho Indonézia kontínua servisu hamutuk hodi buka solusaun pasifíku bá insidente ne’e.

Sidadaun Indonézia lubuk ida, kuaze ema na’in-20  tama teritóriu Timor-Leste ho intensaun atu kasa animal fuik. Depois sira fahe malu bá grupu  haat no grupu ida mak hetan tiru iha área ida bolu Waitama-matan, Aldeia Belulik-kraik, Suku Belulik-leten.

Fatin akontesimentu purvolta kilometru 18 husi Postu UPF Bee Lulik-kraik no tuir informasaun Polísia nian katak, kazu ne’e deskonfia tiru ho kilat manu, maibé prosesu investigasaun sei kontínua no autoridade seguransa Timor-Leste ho Indonézia fó hatene bá públiku katak prosesu sei la’o.

“Mate isin bele hakoi ona, sé nesesáriu bá prosesu investigasaun bele kee fila-fali hodi bele hetan  verdade ba kazu ne’e. Kualker tempu ami bele halo hamutuk ho autoridade Indonézia,” João Belo dos Reis tenik.

Nia informa, Timor-Leste bele halo rekonstrusaun tanba mate iha teritóriu Timor-Leste no bele halo investigasaun konjunta ho autoridade Indonézia hodi  halo mós rekonstrusaun konjunta iha fatin akontesimentu.

Reportajen Ekipa Rafa.tl