Komunidade Xinés iha Timor-Leste Selebra Tinan Foun Imlek 2026

Komunidade Xina iha Timor-Leste hasa'e orasaun tuir sira-nia tradisaun hodi selebra tinan foun Xinés 2026. Imajen/Rafa.tl

DILI, RAFA.tl – Komunidade Xinés iha Timor-Leste selebra tinan foun Imlek  ka tinan foun Xinés 2026 ne’ebé sai hanesan Tinan Foun importante liubá Xinés sira iha mundu tomak, atu agradese no kontinua lori kompromisu sira ba oin ho responsabilidade, kria paz no unidade iha sosiedade.

Tuir Astrolojia Xineza, tinan foun Imlek ka tinan fou Xinés 2026, nu’udar tinan kuda ahi nian, nakonu ho enerjia ne’ebé lori rikusoin no sorte di’ak ba sinál zodíaku sira.

Iha selebrasaun ne’e, Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hamutuk ho komunidade Asosiasaun Emprezariál Komunidade Xineza Timoroan, Kathleen Gonçalves, halo vizita ofisiál ba Embaixada Xina iha Timor-Leste hodi kumprimenta Embaixadora Wang Wenli ho traballadór sira.

“Ohin loron, Anu Novu Xinés nian, bai-bain ita hotu-hotu dehan, “Gong Xi Fa Cai”, ne’ebé ohin ha’u mai hato’o ha’u nia boas festas ba Embaixadora ho komunidade Xinés sira ne’ebé mak hamutuk ho Señora Kathleen  ho komunidade barak los iha ne’e atu selebra sira nia loron boot. Husu boot ba Na’i Maromak tulun ita hotu-hotu hanesan Amo Papa rai hela liafuan di’ak ba ita hotu Fraternidade Umana, katak iha loron saida de’it festeza hamutuk nu’udar ema,” Vise-Primeiru-Ministru Francisco Kalbuadi Lay ba jornalista sira iha Embaixada Xina iha Díli, Tersa (17/02/2026).

Iha fatin seluk Prezidente Asosiasaun Emprezariál Komunidade Xineza Timoroan, Kathleen Gonçalves informa sira selebrasaun tinan foun Imlek iha Díli ne’e hahú  ritual Xina nian ne’ebé konsentra iha fatin Xina Maromak hodi reza no  kontinua kumprementa ba Embaixadora Wang Wenli ho funsionáriu Embaixada Xina  nian iha Timor-Leste.

“Hanesan ita hotu hatene,  komunidade Xineza iha Timor-Leste hamutuk rihun-20 resin,  mensajen anu novu nian lori ona alegria Festivál Primavera nian mai iha ita nia rai laran, no mós halo ona kontribuisaun ba ita, kooperasaun ekonomika no komersiál kulturál, iha Nasaun Xina loron ida ne’ebé boot liu maka loron Tinan foun Imlek,” Kathleen Gonçalves hateten.

Kathleen Gonçalves sente triste, loron espesiál ida ne’e seidauk sai loron ferias ba públiku ba komunidade, kompara ho loron Izlamiku nian, hotu-hotu hetan feriadu.

“Ne’ebé Asosiasaun Emprezariál no komunidade Xineza Timoroan hato’o ona pedidu ba Governu hodi tau mós konsiderasaun ba loron Xina  nian iha Timor Leste,” nia tenik.

Embaixadora Wang Wenli agradese ba Governu Timor-Leste liu-liu komunidade Timor-Leste ne’ebé konsidera no selebra loron Xina nian.

“Ohin maka loron dahuluk ba Festivál Primavera tradisionál Xinés nian. Uluk nana’in, ha’u hakarak hato’o votu ksolok ba maluk sira iha Timor-Leste iha Tinan Kuda nian.  Ohin maka Tinan Foun Xinés.  Ha’u dezeja belun Xineza sira hotu sorte di’ak ba tinan foun,” Wang Wenli hateten.

Wang Wenli subliña, loron ohin maka festa ne’ebé importante liu no sira-nia parte mós nota ona katak Timoroan komesa hatene didi’ak Festivál Primavera nian, no loron ida ne’e  bele selebra festa tradisionál hamutuk ho povu Timor-Leste.

Reportajen ekipa Rafa.tl