Komisaun Revizaun Rekrutamentu PNTL Hahú Serbisu

Kandidatu ajente PNTL sira halibur malu área Tasi-ibun Palásiu Governu nian hodi submete petisaun ba PM Xanana Gusmão no ezije atu komisaun rekrutamentu submete mós sira-nia lista iha teste médiku. Imajen/Dok.Rafa.tl

DILI, RAFA.tl– Ekipa komisaun revizaun ba vaga rekrutamentu membru PNTL foun 2025 ne’ebé Governu forma hodi halo revizaun ba rezultadu rekrutamentu  membru PNTL foun hahú  halo  serbisu ona.

Notísia Relevante: Asosiasaun HAK Konsidera Rekrutamentu Ba Kandidatu PNTL Na’in-400 Viola Prinsípiu Boa Governasaun

Ministru Interiór, Francisco da Costa Guterres ba jornalista sira iha Sede nasionál Konsellu Kombatente Libertasaun Nasionál (CCLN, sigla portugés), Tersa (03/03/2026) hateten, bainhira Konsellu Ministru aprova tiha desizaun ne’ebé deside katak suspende prosesu rekrutamentu vaga ba membru PNTL foun 2025, nune’e  hanesan Ministru Interiór rezolusaun Governu nian fó kbiit hodi forma kedan ekipa no ekipa sira ne’e  hahú serbisu iha loron 23 fulan-Fevreiru 2026.

“Agora rezolusaun sai tiha ona, Governu mandata tiha ona, komisaun ne’e agora dadaun halo ona serbisu, sira reuniaun tiha ona iha semana kotuk ne’ebé agora ba oin ha’u labele ko’alia buat ruma. Ha’u ko’alia ha’u bele politikamente  influénsia nia rezultadu serbisu, ne’ebé ha’u husik hela buat ruma imi ko’alia ho komisaun, komisaun mak sei anúnsia rezultadu,” Ministru Fransisco da Costa Guterres hateten. Ekipa Komisaun ne’e kompostu husi Polísia Austrália, Guarda Nasionál Repúblikanu (GNR), ekipa Ministeriu Interiór nian, Prevedór Direitus Humanus no Justisa (PDHJ), Funsaun Públika, Vetenu, Jerasaun Pátriota, Jurista balun, Ministériu Edukasaun, Sekretária Estadu Igualdade no Inklusaun (SEII), Komisaun B Parlamentu Nasionál no Pesoál Prezidensiá Repúblika.

“Ita tenke fiar sira, nu’udar Timoroan ha’u tenke fiar sira, ha’u hatene katak sira iha kapasidade atu bele rezolve problema ne’e. Ne’ebé ha’u tau fiar ba sira 100%,”  Francisco da Costa Guterres afirma.

Ministru Interiór ne’e mós garante ekipa sira ne’e sei rezolve problema ne’e no garante mós katak ekipa ne’e hasai rezultadu ne’ebé mak di’ak, tanba komisaun supervizasun ne’e la’ós lidera husi Komandu Jerál PNTL no Segundu Komandante Jerál, maibé ministériu nia ema mak lidera no sei garante transparánsia.

Reportajen ekipa Rafa.tl