Komisaun Rekrutamentu PNTL Distribui Matéria Ezame, La Admite Kandidatu Tarde

Komisáriu Polísia Pedro Belo entrega matéria ezame ba Komisaun Rekrutamentu kadete Polísia 2025 iha Akademia Polísia, Sesta (10/10/2025). Imajen/Rafa.tl

DILI, RAFA.tl – Komisaun rekrutamentu kadete foun Polísia Nasionál Timor-Leste (PNTL) ba tinan 2025, distribui ona materiál ezame ba pontu fokal sira kamandu polísia munisípiu nian no husu ba kandidatu sira hotu atu kumpre regra no pontualidade iha faze ezame kultura ne’e.

Notísia Relevante: Kandidatu Ajente PNTL Na’in-12.851 Pasa iha Selesaun Dokumentu

Portavóz Komisaun Rekrutamentu PNTL 2025, Superintendente Polísia, António da Lúz, husu ba kandidatu ajente PNTL foun  hamutuk 12.851 atu kumpre oras (pontualidade) hodi to’o iha fatin tuir ezame no bainhira ba  tarde Komisaun sira sei la autoriza atu tuir prova kultural.

“Oráriu sira fó sai hotu ona, ne’ebé hahú tuku 07:00  to’o tuku 08:00 dadeer Otl, kandidatu sira iha ona fatin ezame nian, iha tuku 10:00 Otl ,  ezame hahú ona, tanba ne’e mak husu ba kandidatu sira labele tarde, se tuir regra tarde ona labele tuir ezame,” Superintendente Polísia António da Luz, ba Jornalista sira iha Sentru Formasaun Polísia, Comoro, Dili, Sesta (10/10/2025).

Komisaun Rekrutamentu Polísia prepara mós notifikasaun ba  kandidatu sira, nune’e hotu-hotu bele kumpre.

Superintendente Polísia António da Luz  fó  hanoin ba kandidatu sira, ne’ebé hela iha Postu Administrativu sira, atu hakbesik an ba iha Komandu PNTL Munisípiu sira, nune’e iha Dominggu bele partisipa.

“Matéria sira ne’ebé uza ba ezame mak hanesan Lapis 2B, apagador, afiador, regua, buat sira ne’e labele haluha, inklui lori kartaun ne’ebe antes ne’e komisaun fó ona. Kandidatu sira labele haluha kartaun eletorál ka Bilete Identidade Orijinal hodi hatudu ba Komisaun tama ba aula hodi tuir ezame,”  nia hateten.

Superintendente Polísia, António da Lúz, garante prosesu rekrutamentu ba memebru PNTL foun 2025, sei la’o ho transparante, tanba iha mós ekipa independente sira ne’ebé sei monitoriza ba prosesu sira ne’e, hetan akompañamentu mós husi ekipa Ministeriu Interiór, Parlamentu Nasionál, Prezidénsia  Repúblika, no mós sosiedade sivíl sira.

Reportajen ekipa Rafa.tl