Komisáriu Jerál Polísia Henrique da Costa Apresia Servisu Ekipa Konjunta PNTL ho F-FDTL

Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa. Imajen/Rafa.tl

DILI, RAFA.tl – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, apresia ho servisu ekipa konjunta PNTL ho FALINTIL-Forsa Defeza Timor-Leste (F-FDTL) ne’ebé asegura no garante seguransa másimu iha selebrasaun Natal, 24-25 Dezembru 2025 no tinan foun, 01 Janeiru 2026.

Notísia Relevante: Kazu Asaltu Malu iha Ainaro ho Baucau, PNTL Aprezenta Ona Ba Ministériu Públiku

“Ita agradese no apresia  ba esforsu tomak ne’ebé ekipa konjunta sira halo, no mós agradese ba Governu tanba iha inisiativa hodi koloka forsa rua hamutuk hodi halo servisu hamutuk, koordena medida prevensaun sira. Ita akompaña hahú husi forma forsa tarefa kordenada halo medida prevensaun ba eventu sira hahú husi loron 28  fulan-Novembru nian tama to’o iha Natal ho Tinan foun nian, la’ós de’it kapitál Díli maibé ba munisípiu tomak to’o área rurál sira, inklui liña fronteira terrestres,” Komisáriu Jerál Polísia Henrique da Costa hateten ba jornalista sira iha Kuartel Jerál PNTL, Tersa (06/01/2026).

Komisáriu Jerál Polísia Henrique da Costa afirma, servisu ekipa PNTL ho F-FDTL kapás tebes lori rezultadu di’ak, ema hotu-hotu hakmatek, mézmu  mosu duni problema balun, kauza husi ema lanu hodi provoka tuda-malu, maibé la fó impktu ba seguransa nasionál.

Nia hatutan, parte Komandu Jerál fó ona orientasaun ba Komandante Operasaun husi PNTL ho F-FDTL atu prepara relatóriu ba seguransa durante ne’e, atu aprezenta ba iha Komandu PNTL ho F-FDTL hodi submete ba Ministru Interiór ho Ministru Defeza.

Semana oin sei halo serimónia parada konjunta husi ekipa tarefa PNTL ho F-FDTL hodi ensera sira nia ekipa konjunta, tanba ne’e ekipa tarefa sei halo preparasaun.

Komisariu Jerál Polísia Henrique da Costa subliña, maske durante ne’e mosu konfrontu tuda-malu iha parte Munisípiu Ainaro ho Baucau hodi rezulta membru Polísia na’in-tolu kanek, no joven ida hetan tiru ho gás lakrimojéniu iha Baucau, maibé Polísia ne’ebé  hetan tiru ho kílat anin ne’e agora halo hela tratamentu iha Ospitál Nasionál Guido Valadares (HNGV) hodi halo operasaun.

Reportajen ekipa Rafa.tl