Komisáriu Jerál PNTL Husu Sidadaun Hotu Kontribui Ba Pás Durante Natal-Tinan Foun 2026

Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa. Imajen/Rafa.tl

DILI, RAFA.tl– Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, husu sidadaun hotu kontribui ba pás durante selebrasaun Natal ho Tinan Foun 2026.

Notísia Relevante: Natal Tempu Atu Hafoun Vokasaun Sarani Nian no Sai Roman Ba Sosiedade

Komisáriu Jerál Polísia Henrique da Costa hato’o nia deklarasaun ne’e iha nia mensajen natal no tinan foun nian ba sidadaun hotu no husu atu ema hotu nafatin fó solidariedade, domin no dame ba malu.

“Iha époka Natal ida-ne’e, marka ho fiar, fraternidade, no esperansa. Atu espíritu Natal nian hafoun iha uma ida-idak ho valór dame nian, solidariedade, respeitu, no domin ba malu,” Komisáriu Jerál Polísia Henrique da Costa ba jornalista sira iha Díli, Kuarta (24/12/2025)

Komisáriu Jerál Polísia ne’e hatutan tinan ida-ne’e lori dezafiu ne’ebé signifikativu, maibé mós lisaun ne’ebé importante. PNTL reafirma nia kompromisu atu kontínua serbí povu ho profisionalizmu, disiplina, integridade no dedikasaun, hametin konfiansa entre polísia ho komunidade hodi kontribui ba estabilidade, seguransa no dezenvolvimentu.

Durante períodu festeza ida-ne’e,  Komisáriu Jerál Polísia Henrique da Costa, apela atu mantein pás, orden públika, no konvivénsia armonioza entre família, hodi respeita lei no valór sira ne’ebé halibur Timoroan nu’udár nasaun.

“Mai ita selebra Natal no tinan foun ho responsabilidade, diálogu, no espíritu toleránsia,” nia hateten.

Komisáriu Jerál Polísia Henrique da Costa  mós apela ba utilizadór estrada públika atu hasae imi nia kuidadu iha tráfiku rodoviáriu, respeita regra tránzitu nian, no prezerva ema nia vida.

Ba tinan foun 2026, ema hotu  hafoun nia determinasaun atu serbisu la kolen ba manutensaun orden públika, protesaun ema no propriedade, no respeitu ba direitu umanus, iha kooperasaun metin ho instituisaun hotu.

“Ba membru  PNTL sira, nu’udár Komandante Jerál PNTL  oferese liafuan rekoñesimentu espesiál ida ba imi-nia esforsu, sakrifisiu, no sentidu misaun nian, dala barak dook hosi imi-nia família, ba bem-komún no seguransa nasionál,”  Henrique da Costa hateten.

Hanesan Komandu Jerál PNTL no lori instituisaun PNTL nia naran hato’o ksolok natal no tinan foun 2026 ba imi hotu, ho saúde, dame, esperansa no konfiansa iha futuru ida ne’ebé di’ak ba beibeik ba Timor-Leste.

Reportajen ekipa Rafa.tl