Komandu PNTL Munisípiu Dili Dezarma Membru Polísia Ne’ebé Tiru Nia Kaben

Vítima ho insiál VCV ne'ebé hetan tiru hala'o hela tratamentu intensivu iha HNGV. Imajen/Rafa.tl

DILI, RAFA.tl– Komandante Polísia Nasionál Timor-Leste (PNTL) Munisipíu Dili, Superintendente Xefe Polísia, Orlando Gomes, informa Komandu PNTL dezarma ona membru polísia ho inisial JLO ne’ebe tiru kanek nia kaben ho insial VCV hodi submete ba prosesu disiplinár no justisa.

Notísia Relevante: Membru PNTL Ida Tiru Nia Kaben Ne’ebé ho Kondisaun Isin-rua

“Kazu refere iha momentu ne’eba dezarma kedas ami-nia membru ne’e,  ami detein  nia iha sela detensaun, agora prosesa ona ba iha oras 72 no Diresaun Investigasaun Kriminál Nasionál mak  atende hodi lori prosesu kazu ne’e ba oin,” Superintendente Xefe Polísia Orlando Gomes informa ba jornalista sira iha Polísia Eskuadra Dom Aleixo, Dili, Segunda (13/10/2025).

Superintendente Xefe Polísia ne’e esplika Komandu Dili submete ona relatóriu ba Komandu Jerál PNTL hodi foti medida sansaun dixiplinár no kriminál hodi aplika ba membru ne’ebé ho nia diviza Superintendente-Xefe Polísia ne’e.

Parte dixiplinár no justisa PNTL nian sei haree ba sekuénsia hotu husi kazu ne’e, depois sei estuda no análize kle’an mak  foin bele foti desizaun.

Komandante ne’e mós lamenta ho aktus ne’ebé membru PNTL ne’e halo tanba utiliza arma pistola la tuir dalan no regra ne’ebe estabelese  iha instituisaun.

“Instituisan PNTL ne’e estadu nian, atribui mai iha Polísia Nasionál atu servi Povu no Nasaun, ne’ebe sasan estadu nian ita utiliza atu bele apoiu ba meus sira atu halo  seguransa ho di’ak, maibé kuandu utiliza arma la tuir estadu no la tuir lei, ita  sei prosesu ho rigorozu,” Nia afirma.

Komandu PNTL Munisípiu Dili foti ona deklarasaun husi vítima, testemuña no mós suspeitu, hodi halo auto  prosesu atu enkamiña ba Ministériu Públiku.

Reportajen ekipa Rafa.tl