Komandu F-FDTL Ameasa Demite Membru sira Ne’ebé Viola Regra Militár no Baku Sidadaun sira

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”. Imajen/Rafa.tl

DILI, RAFA.tl– Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, orienta ona Polísia Militár (PM)  halo investigasaun ba membru F-FDTL ida ne’ebé halo agresaun fiziku hasoru  sidadaun ida ne’ebé virál iha média sosiál iha Suku Malilait, Postu Administrativu Bobonaro Vila, Munisípiu Bobonaro.

Tenente Jenerál Falur Rate Laek mós orienta ona Polísia Militár investiga  membru F-FDTL ida ne’ebe halo agresaun fiziku hasoru Polísia ida iha Baucau Vila, inklui membru militar ida ne’ebé organiza joven balun hodi baku rahun uma iha área Queliqai, Munisípiu Baucau.

Tenente Jenerál Falur Rate Laek konfirma katak nia  seidauk simu relatóriu ba kazu sira envolve membru F-FDTL, maibé  nia oreinta ona Polísia Militár halo hela investigasaun bainhira kontra regra militár sei demite husi institusaun F-FDTL.

“Bobonaro nia relatoriu ha’u seidauk hare. Ha’u mós rona tiha ona, loron-boot ha’u ba iha ne’ebá ema komesa posting, ema komesa ko’alia barak ona mais relatóriu ofisiál seidauk simu, maibé há’u hatene katak prosesu la’o hela Polísia Militár bolu ona halo investigasaun  depois ita haré medida positiva saida mak halo,” Falur Rate Laek hateten hodi hatan jornalista sira iha Kuartel Jenerál F-FDTL iha Fatuhada, Kuarta (05/11/2025).

Tenente Jenerál  Falur Rate Laek afirma ba kazu dezintendimentu entre membru F-FDTL ho naran inisial OGDC halo agresaun fiziku hasoru membru Polísia ida ho inisial C, no mós militar ida oragniza joven balun iha Queliqai  hodi asalta baku rahun uma komunidade nian mós iha hela prosesu investigasaun.

Falur Rate Laek afirma kuandu iha violasaun grave ona ne’e tenke demisaun, kuandu justisa deside sai ne’e sai ona. Maske nune’e, prosesu sei naruk halo investigasaun depois halo tun-sae tama tiha audénsia depois tama iha ne’ebá, kuandu baku ona ne’e ran sai,  sala ona kualker  forma ema kanek ona ran sai nia kauza gravildade todan no kaman ne’e justisa mak sukat.

Iha sorin seluk membru Parlamentu Nasionál husi Bankada FRETILIN, David Dias Ximenes “Mandati” lamenta  ho asaun  membru militár balun ne’ebe uza forsa hodi halo agresaun fiziku hasoru sidadaun sira ne’e krimi ne’ebe labele tolera.

“Agresaun fízika ne’e krime ona. Nia halo ona krime hanesan ne’e, prosesu disiplinar sae kedas nia, suspensaun. Depois iha ne’eba agresaun fíziku ne’e simples ka agravada, orsida ba iha tribunál mak sei deside, mas krime ne’é labele tolera, kuantu mais ita-nia ema sira ne’ebé asegura ita nia rai ho ita nia povu,” Deputadu David Mandati afirma.

Reprezentante povu ne’e subliña hahalok ka aktu sira ne’ebé militár sira halo hasoru povu, liu-liu agresaun fíziku sira ne’e labele, sala boot no labele tolera.

Reportajen ekipa Rafa.tl