Komandante Jerál PNTL Ameasa Hasai Ajente-Xefe Polísia JLO Ne’ebé Tiru Nia Káben ho Kondisaun Isin-Rua

Komandante Jerál PNTL, Komisáriu Jerál Polísia Henrique da Costa. Imajen/Espesiál

DILI, RAFA.tl – Komandante Jerál Polísia Nasionál Timor-Leste (PNTL),  Komisáriu Jerál Henrique da Costa, hein aprezentasaun relatóriu husi Konsellu Superiór PNTL, molok deside halo demisaun ba Ajente-Xefe Polísia  ho inisiál JLO ne’ebe tiru nia káben ne’ebé ho kondisaun isin-rua.

Notísia Relevante: Komandu Jerál PNTL Aplika Sansaun Dixiplinár Ba Ajente-Xefe Polísia JLO Ne’ebé Tiru Nia Káben

“Komandu Jerál PNTL sei foti medida rigór hasoru membru refere, ami mós fó atensaun ba iha membru se de’it, atu nune’e, uza arma tuir regra ne’ebé maka vigór iha Polísia Nasionál Timor–Leste. Ita bele lori ba iha Konsellu Susperiór para deside bele mós iha demisaun, bele tama iha ne’ebá, tanba Konsellu Susperiór maka bele deside tama iha demisaun ka depende ba faktu no prova sira ne’ebe mak parte desiplina aprezenta, ” Komandante Jerál PNTL, Komisáriu Jerál Polísia Henrique da Costa hateten hodi responde Rafa.tl iha Otél Plam Spring, Fatuhada, Dili, Sesta (24/10/2025).

Komisáriu Jerál Polísia la tolera membru polísia ne’ebé uza arma la tuir orden Komandu  PNTL nian no sei foti medida ne’ebé rigór hodi atua no defende dignidade ka naran diak instituisaun no nasaun nian.

“Ita sei foti medida sériu no maka’as hasoru membru sira ne’ebé mak uza sala arma, la iha orientasaun komandu, mas uza arma tuir sira-nia hakarak hodi hamonu dignidade instituisaun nian iha komunidade nia oin,” Henrique da  Costa hateten.

Asaun ne’ebé ajente-xefe Polísia JLO komete ne’e, parte  Tribunál Judisiál Primeira Instánsia Dili (TJPID) liuhosi juiza Jumiati Freitas hatun despaxu hodi aplika medida koasaun aprezentasaun periódika ba arguidu ajende-xefe Polísia JLO.

Dau-daun ne’e vítima ho insiál VCV ne’ebé ho kondisaun isin-rua halo hela tratamentu tradisionál iha parte Bidau Masaur, Dili, tanba nia ain sorin tohar kona bala pistola nian ne’ebé tiru husi nia kaben ajente-xefe polísia JLO.

 Reportajen ekipa Rafa.tl