Klubu Sira Liga Futsal Timor-Leste Hahú Kontrata Jogadór Estranjeiru

Logotipu

Díli, 04  Setembru 2026 (RAFA)- Klubu hirak ne’ebé rejistu atu compete iha Liga Futsal Timor-Leste (LFTL) époka 2026 hahú buka no kontrata jogadór estranjeiru ho lokál sira.

Ambisaun ne’ebé kada lubu sira iha mak oinsá sira bele hetna titulu kampiaun ba jogu époka ida-ne’e. Ho nune’e,  maneira hotu sira foti, inklu halo kontratu ho jogadór estranjeiru sira atu bele reforsa sira-nia klubu no atinje sira-nia alvu “kampiaun”.

Klubu Primeira Divizaun LFTL, São Francisco Xavier (SFX) halo mós rekrutamentu ba jogadór estranjeiru na’in-rua husi Indonézia  no hatudu ambisaun ho alvu atu garante vaga ba Final Four antes konsentra ba luta ba títulu kampiaun.

“Jogadór estranjeiru se’i mai na’in-rua mai husi Papua hodi haforsa jogadór lokál hotu. Tanba sistema Liga agora ne’e final four sei kompete tan fali, ami nia objetivu primeru ne’e mak tama final four depois mak konsentra ba juara,” Prezidente Klubu São Francisco Xavier, Francisco Patrocino Antonino ba RAFA iha kampu Futsal, Timor Lodge, Kinta-ne´e.

Aleinde jogadór estranjeiru nain-rua, SFX mós aumenta jogadór lokal foun na’in-tolu, inklui guarda-rede ida husi Santa Cruz, enkuantu jogadór lokal rua seluk kontinua nafatin ho ekipa ne´ebé antes ne’e klubu iha.

Francisco Patrocino Antonino akresenta, kompozisaun plantel ne’e hatudu katak SFX sei buka balansu entre esperiénsia husi jogadór estranjeiru no dezenvolvimentu talentu lokal ba kompetisaun temporada ida-ne’e.

 F.C Kuda Ulun Rekruta Mós Jogadór Estranjeiru Na’in-haat

Klubu promovidu ba primeira divizaun Liga Futsal Timor-Leste (LFTL) époka 2026, F.C Kuda Ulun rekruta jogadór estranjeiru na’in-haat hodi kombina ho jogadór lokal  sira ba forsa plantel atu kompete iha Liga tinan-ne´e.

Sekretariu jerál klubu F.C Kuda Ulun, Jeca Ferreira, hatete Jogadór estranjeiru foun na’in-haat, ne’e mai hotu husi Indonézia.

“Ambisaun ita iha hotu, tanba ne’e mak ami mós lakohi lakon, ami mós iha jogadór estranjeiru nune’e bele motiva ami nia jogadór sira seluk ,” hateten Jeca Ferreira.

Esforsu hirak-ne’e sei hametin plantel F.C Kuda Ulun ba kompetisaun Liga Futsal Timor-Leste Primeira Divizaun époka 2026-2027.

Provizoriamente, maioria jogadór F.C Kuda Ulun mai husi Terseiru Divizaun no Segunda Divizaun. Depois promovidu ba Primeira Divizaun, klubu mantén jogadór lokal na’in-hitu ne’ebé iha ona iha plantel no aumenta tan jogadór lokal foun nain hitu.

F.C Kuda Ulun mós rekruta jogadór balu husi Ramelau F.C no Crazy Horse F.C na’in-rua atu hametin ekipa hasoru kompetisaun Primeira Divizaun temporada ida-ne’e.

Jornalista: Davilio Valdamir/ Domingos Bere