Klubu Futebol 25 Kompete iha Copa Avo Nana 2026

Enkontru komisaun organizadora Copa Avo Nana 2026.

Díli, 23 Agusto 2026 (RAFA)-  Komisaun organizadora ajusta ona klubu hamutuk 25 ne’ebé sei kompete iha kompetisaun futebol Copa Avo Nana 2026.

Desizaun ne’e hetan liuhosi enkontru tékniku, ne’ebé realiza iha Domingu ne’e, iha edifísiu Firnie Unipessoal LDA, Comoro, Díli.

Iha intervista Prezidente Komisaun Copa Avo Nana, Feliciano Ximenes hateten,  tinan ne’e komisaun organizadór planu simu deit klubu 20, maibé, tanba iha klubu antigu balu hakarak partisipa, komisaun deside aumenta ba klubu 25.

“Agora diferente ho tinan kotuk, lolos ne’e ami hakarak simu deit klubu 20, maibe klubu balun antigu iha ne’e hakarak kontinua. Entaun, ami tenke simu to’o 25 klubu ho nune’e ohin ami realiza teknikal mitting, ” Prezidente Komisaun organizadora, Feliciano Ximenes informa ba jornalista.

Nia hatutan, tuir planu jogu ba Copa Avo Nana sei abertura iha loron 28 Fulan Agusto ne’e, Maibe nia parte sei koordena mos ho Primeiru-Ministru hanesan nain ba Copa hodi deside orariu ba abertura.

Aliende ne’e, nia haktuir husi teknikal mitting  sira hahu halo preparasaun atu abertura dia 28 Agora, ami mos sei koordena ho Copa nain, ita nia Avo Nana, Ami sei fo data Rua dia 27 no 28, Ita sei realiza iha Díli.

Iha fatin hanesan treinador ekipa husi PNTL, Eduardo Pereira informa katak maske ekipa seidauk halo preparasaun masimu. Maibe, nia orienta ona jogador sira halo preparasaun individual hodi hatudu performa diak iha jogu abertura.

“Iha planu Segunda ne’e ami komesa book a’an loron rua tolu ne’e, hodi infrenta jogu abertura ne’e,” Eduardo Pereira hateten.

Iha jogu abertura ba  Copa Avo Nana 2026 sei disputa entre ekipa PNTL kontra Real Cafe ne’ebe sei realiza iha Estadiu Munisipál Dili. Enkuantu ba jogu apuramentu, komisaun organizadora sei halo konfirmasaun ho Ministériu Juventude, Desportu, Arte no Kultura  kona-ba uza Kampu Akademia Coica Becora. Se la hetan autorizasaun, jogu sei hala’o iha Estadiu Gleno, Ermera.

Klubu futebol sira ne’ebé partisipa iha Copa Avo Nana 2026 ne’e, kompostu husi Jomar FC, Naimeco FC, Reley Laleia FC, FC Warik Oan, Amigo FC, FC Aimo, Resoais Aulain D’One, Cavalho de Fronteira, Laisorulai CF, Ostiku FC, Bairo da Paz, Ermera City, FC Mulia, Vila Vista FC, Buradu FC, FC Sengol, Irapuha FC, F-FDTL FC, FC Fatunsah, Vila Atauro, AD Laivai, FC Zhavia, Fitun Ramelau, no PNTL.

Jornalista: Marito da Costa