Kliente Kompañia RAIMAKMOR Na’in-200 Ezije Devolve Sira-Nia Osan

Vítima sira husi kompañia RAIMAKMOR ezije devolve sira-nia osan iha Eskuadra Polísia Vera Kruz, Díli, Tersa (27/01/2026). Imajen/Rafa.tl

DILI, RAFA.tl – Kliente sira husi kompañia nasionál RAIMAKMOR hamutuk na’in-200, loron-rua tuituir malu, Segunda-Tersa (26-27/01/2026), halibur malu iha resintu Polísia Eskuadra Vera Kruz, Munisípiu Díli, hodi ezije ba prezidente RAIMAKMOR, Armando Ximenes, devolve sira-nia osan.

Notísia Relevante: Deskonfia Kompañia RAIMAKMOR Bosok, Vítima 51 Hato’o Keixa Ba Polísia

Tuir vítima sira ne’ebé reklama atu  RAIMAKMOR devolve sira-nia osan urjentemente, tanba kompañia ne’ebé inisia no lidera husi Armando Ximenes, halo promesa falsu hodi husu sira kada ema hatama osan US$100.00 sei fó fali  ka bele hetan kreditu US$1000.00  no sé mak hatama US$1000.00 simu fali US$10,000.00, nune’e mós sé mak hatama US$2000.00 sei hetan fali US$20,000.00.

Kliente sira kontente ho haksolok ho RAIMAKMOR nia kampañia no kompromisu ne’e. Mas realidade, tuir vítima sira katak, sira hatama tiha osan tinan barak nia laran ona, mas la hetan osan no la asesu ba kreditu to’o ohin loron.

Iha loron 16 fulan-Dezembru tinan 2025, kliente RAIMAKMOR nian hamutuk ema na’in-92 husu apoiu ba Polísia Nasionál Timor-Leste (PNTL), Eskuadra Vera Kruz, Díli, hodi halo mediasaun ho prezidente kompañia RAIMAKMOR, Armando Ximenes.

Rezultadu husi mediasaun ne’e, RAIMAKMOR ho vítima sira  konkorda hodi asina karta kompromisu, katak iha loron 26 fulan-Janeiru tinan 2026, RAIMAKMOR devolve hotu vítima sira-nia osan, maibé to’o agora la tau iha pratika. Nune’e, vítima sira organiza malu hamutuk na’in-200 husu nafatin Polísia nia intervensaun atu ejize Armando Ximenes devolve ona sira-nia osan.

Santino de Jesus Maia, nu’udár vítima ba Rafa.tl iha resintu eskuadra Polísia Vera Kruz, hateten, nu’udár komunidade agrikultór preokupa loos nia osan ne’ebé ho sakrifísiu oioin hetan, maibé nia hatama tiha ba RAIMAKMOR mas to’o ohin loron seidauk devolve.

“Kompañia RAIMAKMOR promete ba ami katak, bainhira hatama osan US$100.00  sei hetan US$1000.00, maibé ne’e bosok tanba ne’e ami husu fó fila ami nia osan,” Santino de Jesus Maia hateten.

Apolinário da Silva, nu’udár mós vítima husu ba kompañia hodi fó fali osan ne’ebé hatama ba kompañia tanba laiha ona esperansa ba na’in RAIMAKMOR, Armando Ximenes.

“Ami lakohi halo krime ho nia (Armando Ximenes, red), maibé ami hakarak foti fila-fali ami nia osan de’it tanba osan ne’e la’ós ai-tahan tanba ne’e ami husi Same hamutuk na’in-200 husu Armando Ximenes fó ami nia osan,” Apolinário da Silva hateten.

Vítima sira alerta, bainhira kompañia la selu sira nia osan tuir promesa ne’ebé iha, sei lori prosesu ba oin no husu ba autoridade kompetente, liu-liu autór seguransa hodi kaer na’in ba kompañia RAIMAKMOR.

Iha fatin hanesan, prezidente kompañia RAIMAKMOR, Armando Ximenes, promete devolve kliente sira nia osan tuir akordu ne’ebé iha, maibé presiza liu husi prosedimentu sira ne’ebé kompañia aplika ba  membru sira ne’ebé rejigna aan.

Armando Ximenes esplika kona-bá ezekusaun ne’e iha diresaun ida-idak, tanba ne’e ohin sira verifika ona kada munisípiu hodi haré ema ne’ebé mak ezekuta ona, no ema balun ne’ebé seidauk ezekuta.

“Preokupasaun vítima sira nian nafatin rezolve nu’udar família, Polísia nafatin sai mediadór no fasilitadór hodi bolu estrutura hotu-hotu mai, atu bele aprezenta dadus ruma husi ha’u nu’udar inisiadór, para ami bele tuur hamutuk hodi fó solusaun,” Armando Ximenes tenik.

Na’in ba kompañia RAIMAKMOR garantia atu rezolve problema ne’ebé vítima sira enfrenta, tanba iha grupu ida rua mak halo sai tiha iha mídia, halo runguranga tiha, maibé buat ne’e la’o hela ne’e sei rezolve.

Komandante Polísia Eskuadra Vera Kruz, Inspetór Xefe Polísia, Ernesto da Costa Guterres, hateten sidadaun sira ne’ebé mak konsentra iha Eskuadra Polísia Vera Kruz ne’e liga ho investimentu husi parte kompañia RAIMAKMOR halo, no tuir informasaun ne’ebé mak PNTL rekolla husi sidadaun sira katak atu tama kompañia ne’e hahú husi rezistu osan ho montante US$35.00 ba ema ida atu partisipa iha kompañia refere.

“Orientasaun husi kompañia husu ba sira atu asesu ba kréditu, bainhira kada ema hatama US$100.00  bele asesu ba kréditu semana ida hetan montante US$1000.00, entaun husi montante ne’ebé mak iha, atrai ema hodi oinsá ema atu fiar, oinsá mak ema bele fó nia osan, entaun ema hotu-hotu hakarak atu tama no asesu ba kréditu ne’e, ikus mai promesa ne’ebé mak sira halo ba ema ne’e la sai

Komandante Polísia Eskuadra Vera Kruz, subliña parte PNTL nafatin akompaña no simu keixa husi komunidade sira hodi hein prosesu ne’e nia kontinuasaun tuir lei ne’ebé vigora.

Reportajen ekipa Rafa.tl