KFP Hamutuk Ho Péritu Internasionál Sei Halo Avaliasaun Ba Investimentu Fundu Petróleu

PM Xanana halo enkontru ho membru board Konsellu Fundu Petrolíferu (KFP) iha Palásiu Governu, Tersa (24/03/2026). Imajen/Rafa.tl

DÍLI, RAFA.tl– Konsellu Fundu Petrolíferu (KFP) hamutuk ho péritu internasionál sira sei halo avaliasaun ba investimentu Fundu Petróleu Timor-Leste nian.

Avaliasaun ba Fundu Petróleu ne’e, sei realiza liu husi semináriu durante loron tolu iha semana ne’e. Membru Board Konsellu Fundu Petróleu hamutuk ho Ekipa Assesoria halo ona atualizasaun kona-bá preparasaun bá avaliasaun ne’e ba Primeiru-Ministru (PM), Kay Rala Xanana Gusmão iha Palásiu Governu, Tersa (24/03/2026).

“Ohin, hasoru Sua exelénsia Primeiru-Ministru para rona Primeiru-Ministru nia hanoin kona-bá fundu petróleu ne’e rasik. Kada tinan, sira halo semináriu ne’ebé partisipa hosi ekipa tékniku Banku Sentrál no Ministériu Finansas atu bele haree investimentu fundu nian no mós despeza ne’ebé mak ita halo durante ne’e,”  Ministra Finansas, Santina Cardoso, informa ba jornalista sira iha Palásiu Governu.

Iha fatin hanesan, membru Board atuál Prezidente Autoridade Nasionál Petróleu (ANP), Gualdino do Carmo da Silva hatete, kada tinan realiza semináriu rua atu halo avaliasaun ba andamentu investimentu Fundu Petróleu nian.

“Ne’e hanesan vizita kortejia, tanba tuir lei Bord relata ba Ministra Finansas nu’udár reprezentante Governu ne’ebé haré portofóliu kona-bá finansas inklui investimentu Fundu Petróleu,” Gualdino do Carmo da Silva esplika.

Membru board sira ne’ebé hasoru-malu ho Primeiru-Ministru kompostu hosi Ministra Finansas, Santina Cardoso, Oligário Castro, professor Michel hosi Austrália, Dr.  Tores hosi Norwegia, Filipe Nério hosi MF no Sekretariadu Agustinho Maia hosi Banku Sentrál Timor-Leste (BCTL, sigla portugés).

Knaar hosi membru board Konsellu Fundu Petrolíferu iha Timor-Leste importante tebes tanba fó orientasaun ba jestaun rikusoin nasaun nian liu-hosi fo konsellu independente ba Governu kona-bá utilizasaun fundu no halo avaliasaun liu-hosi analiza relatóriu FP kada tinan.

Akompaña Estimated Sustainable Income (ESI) hodi alerta bainhira gastu liu limite, fó hanoin kona-bá risku investimentu no halo relatóriu ho rekomendasaun sira bá Governu no públiku.

Servisu ne’e atu promove transparénsia no garante katak jestaun Fundu Petróleu ne’e klaru, responsável ho objetivu boot atu proteje osan petrolíferu, evita gastu sala no garante benefísiu bá agora no futuru.

Reportajen ekipa Rafa.tl