Kazu Utiliza Arma, PNTL Aprezenta Sidadaun Xinés ho Inisiál SD Ba Tribunál

Sidadaun estranjeiru ho nasionalidade Xina utiliza arma PNTL hodi treinu tiru iha fatin treinu tiru iha Kaitehu, Liquiça, foin lalais ne'e. Imajen/dok.Espesiál

DILI, RAFA.tl– Polísia Nasionál Timor-Leste (PNTL), Sesta (21/11/2025), aprezenta sidadaun Xinés ho inisiál SD  ba Tribunal Judisiál Primeira Instánsia Díli (TJPID) hodi tuir julgamentu primeiru interogatóriu.

Notísia Relevante: Autoridade Timor-Leste Asegura Xinés Ne’ebé Envolve iha Utiliza Pistola ho Kilat PNTL Treinu Tiru iha Kaitehu

Sidadaun Xinés ne’e, autoridade Timor-Leste halo detesaun  iha Tersa (18/11/2025), bainhira atu sai hosi teritóriu nasionál Timor-Leste liuhosi Aeroportu Internasionál Prezidente Nicolau Lobato, Dili.

Sidadaun Xinés ho inisiál SD deskonfia envolve iha utiliza kílat ho pistola Polísia Nasionál Timor-Leste (PNTL) nian hodi treinu tiru iha Kaitehu, Munisípiu Liquiça, ne’ebé fasilita husi membru Kurpu Seguransa Pesoál (CSP, sigla portugés) ida.

Porta-voz Komandu Jerál PNTL, Superintendente Polísia, João Belo dos Reis hatete, sidadaun Xinés ida ne’ebé asegura iha Aeroportu Internasionál ne’e, PNTL sei aprezenta  ba Tribunál hodi tuir julgamentu  Primeiru Interogatóriu.

“Sidadaun Xineza inisiál SD ne’ebé ita hapara nia iha Aeroportu, ita husu orientasaun ba Ministériu Públiku (MP) ita halo detensaun fora de flagrante delitu, tanba nia halo tentativa halai husi krime balun ne’ebé mak ita konsidera nia krime tiha ona iha pasadu. Liu husi orientasaun ne’ebé mak ita hetan, ita halo kedas detensaun ba nia. Ita aprezenta ba iha Tribunal hodi halo Primeiru Interogatóriu ho krime arma proibidu ho NUK, 0313/2025-PNSIK,” Porta-voz Seguransa Ministériu Interiór (MI), Superientendente Asistente Polísia João Belo dos Reis, ba jornalista sira iha sala konferénsia MI, Vila-Verde, Kinta (20/11/2025).

Superintendente Polísia ne’e afirma Polísia halo detensaun ba  sidadaun Xinés ho naran inisiál SD  ne’e tanba envolve iha  kazu ne’ebé virál iha mídia sosiál kona-bá utiliza arma hodi treinu tiru iha kaitehu Munisípiu Liquiça.

“Segredu justisa ha’u sei la ko’alia, saida mak ami halo sei aprezenta ba iha Ministériu Públiku (MP), sidadaun iha ne’e primeira identifikasaun hala’o tiha ona aplika Termu Identidade Rezidénsia (TIR) maibé  nia iha tentativa atu sai husi Timor-Leste,”  nia afirma.

Reportajen ekipa Rafa.tl